گورکھپور، 16 ستمبر (ہ س) ۔وزیر اعلیٰ یوگی آدتیہ ناتھ نے کہا کہ ساڑھے نو سال قبل مشرقی اتر پردیش میں انسیفلائٹس سے تڑپتے بچوں اور دم توڑتے بچپن کو دیکھ کر ہر باشعور والدین فکرمند رہتا تھا، لیکن اب یہ تشویش ختم ہو چکی ہے۔ انہوں نے کہا کہ مافیا اور مچھروں کی طرح انسیفلائٹس بھی ختم ہو گیا ہے۔ اب ہم نئے دور میں نئے گورکھپور اور نئے اتر پردیش کا مشاہدہ کر رہے ہیں۔ وزیر اعلیٰ نے کہا کہ حکومت ریاست کے تمام ضلعی اسپتالوں میں 10،10 بستروں پر مشتمل ڈائلیسس یونٹس کی سہولت شروع کر رہی ہے۔

وزیر اعلیٰ یوگی آدتیہ ناتھ نے بدھ کی صبح انڈین میڈیکل ایسوسی ایشن (آئی ایم اے) گورکھپور کی جانب سے چلائے جانے والے چیریٹیبل بلڈ بینک کی افتتاحی تقریب سے خطاب کیا۔ وزیر اعلیٰ نے فیتہ کاٹ کر چیریٹیبل بلڈ سینٹر کا افتتاح کیا اور مرکز کا دورہ کرکے وہاں دستیاب سہولیات، آلات اور انتظامات کے بارے میں معلومات حاصل کیں۔

افتتاحی تقریب سے خطاب کرتے ہوئے مشرقی اتر پردیش کی صحت کی خدمات میں آنے والی مثبت تبدیلیوں کا ذکر کرتے ہوئے وزیر اعلیٰ نے کہا کہ ساڑھے نو سال پہلے گورکھپور کا بی آر ڈی میڈیکل کالج ہی اس خطے میں صحت کی سہولیات کا اہم مرکز تھا۔ اس وقت صورتحال یہ تھی کہ ایک ہی بستر پر چار چار مریض تک زیرِ علاج رہتے تھے۔ تیسری منزل پر انسیفلائٹس وارڈ تھا، جہاں پنکھوں، بیت الخلا اور دیگر ضروری سہولیات کا بھی فقدان تھا۔ انہوں نے کہا کہ جو بی آر ڈی میڈیکل کالج پہلے خود بدحالی کا شکار تھا، آج وہی سپر اسپیشلٹی سینٹر بن چکا ہے اور انسیفلائٹس سمیت مختلف بیماریوں کے علاج کا اہم مرکز ہے۔

وزیر اعلیٰ نے کہا کہ گورکھپور میں ایمس بھی قائم ہو چکا ہے۔ مہاراج گنج، کشی نگر، دیوریا، سدھارتھ نگر، بستی، بلرام پور، بہرائچ، گونڈہ، ایودھیا اور امبیڈکر نگر سمیت مختلف اضلاع میں میڈیکل کالج شروع ہو چکے ہیں۔ ریاست میں 75 اضلاع ہیں، جبکہ میڈیکل کالجوں کی تعداد بڑھ کر 85 ہو گئی ہے۔ دو ایمس بھی کام کر رہے ہیں۔ ایم بی بی ایس کی نشستیں 4,600 سے بڑھ کر 13,500 سے زیادہ ہو چکی ہیں، جبکہ پی جی کی نشستیں دوگنی ہو گئی ہیں۔ نرسنگ اور پیرا میڈیکل تعلیم کا بھی دائرہ وسیع کیا جا رہا ہے۔

ہندوستھان سماچار

---------------

ہندوستان سماچار / عبدالسلام صدیقی