کولکاتا، 23 اگست (ہ س)۔ جنگی جہازوں کی تیاری کو فروغ دینے کے مقصد سے کولکاتا کے گارڈن ریچ شپ بلڈرز اینڈ انجینئرز میں اتوار کو 3400 کروڑ روپے کی لاگت سے پانچ نئے دفاعی منصوبوں کا سنگ بنیاد رکھا گیا۔ اس موقع پر مرکزی وزیر دفاع راج ناتھ سنگھ اور مغربی بنگال کے وزیر اعلیٰ شبھیندو ادھیکاری موجود تھے۔

تقریب سے خطاب کرتے ہوئے راج ناتھ سنگھ نے مغربی بنگال کی بی جے پی حکومت کی تعریف کرتے ہوئے کہا کہ ریاست میں اب صنعتوں کے بند ہونے کی نہیں بلکہ سرمایہ کاری کی خبریں سامنے آرہی ہیں۔سنگ بنیاد رکھے جانے والے پانچ منصوبوں میں رائچک شپ یارڈ، ٹمبر پونڈ شپ بلڈنگ سہولت، دامودر شپ بلڈنگ سہولت، ریڈیئل فورجنگ پلانٹ اور 3000 ٹن صلاحیت والا اوپن ڈائی فورجنگ پریس شامل ہیں۔

وزیر دفاع نے کہا کہ یہ منصوبے بھارت کے مستقبل کے عزم کو مضبوط کریں گے اور ’میک اِن انڈیا‘ اور ’آتم نربھر بھارت‘ کے جذبے کو آگے بڑھانے میں اہم کردار ادا کریں گے۔راج ناتھ سنگھ نے کہا کہ وزیر اعظم نریندر مودی کا مقصد بھارت کو دفاعی شعبے میں مکمل طور پر خود کفیل بنانا ہے۔ ان منصوبوں کے ذریعے اسی سمت میں ایک اہم قدم اٹھایا گیا ہے۔انہوں نے کہا کہ مغربی بنگال میں سرمایہ کاری کا ماحول تبدیل ہو رہا ہے اور وزیر اعلیٰ شبھیندو ادھیکاری کی قیادت میں ریاست ترقی کی راہ پر آگے بڑھ رہی ہے۔ اگر مقصد واضح ہو تو ترقی کو کوئی روک نہیں سکتا۔

وزیر دفاع نے کہا کہ ان منصوبوں کے قیام کے بعد مستقبل میں کئی معاون صنعتیں بھی وجود میں آئیں گی۔ مغربی بنگال نے ملک کی نشاۃ ثانیہ میں اہم کردار ادا کیا ہے اور اب ریاست صنعتی نشاۃ ثانیہ کی سمت آگے بڑھ رہی ہے۔ انہوں نے کہا کہ ریاست میں ہونے والی سرمایہ کاری کے دور رس نتائج برآمد ہوں گے۔

وزیر اعلیٰ شبھیندو ادھیکاری نے کہا کہ ان دفاعی منصوبوں سے ریاست میں روزگار کے نئے مواقع پیدا ہوں گے اور معیشت کو مضبوطی ملے گی۔انہوں نے کہا کہ مغربی بنگال میں تربیت یافتہ افرادی قوت کی دستیابی اور بہتر رابطہ نظام سرمایہ کاری کے لیے سازگار ماحول فراہم کرتے ہیں۔ ان منصوبوں سے بڑی تعداد میں لوگوں کو روزگار ملنے کی امید ہے۔شبھیندو ادھیکاری نے ملک کے دفاعی نظام کو جدید بنانے میں وزیر دفاع راج ناتھ سنگھ کے کردار کی بھی تعریف کی۔ آپریشن سندور کا ذکر کرتے ہوئے انہوں نے کہا کہ بھارتی فوج نے جس طرح دشمن کو جواب دیا اور براہموس میزائل کی صلاحیت کے ذریعے ملک کے دفاعی نظام کو مضبوط کیا، وہ دنیا کے سامنے ایک مثال ہے۔انہوں نے کہا کہ وزیر اعظم نریندر مودی کی رہنمائی اور وزیر دفاع راج ناتھ سنگھ کی قیادت میں بھارت دفاعی شعبے میں عالمی سطح پر قائدانہ کردار کی جانب بڑھ رہا ہے۔

ہندوستھان سماچار

ہندوستان سماچار / Mohammad Khan