نئی دہلی، 23 اگست (ہ س)۔

صفدرجنگ اسپتال نے جدید آرتھوپیڈک علاج کے میدان میں ایک اہم کامیابی حاصل کی ہے۔ مرکزی امراض ہڈی کے ادارے نے 22 اگست کو روبوٹ کی مدد سے پہلی مکمل گھٹنے کی تبدیلی کی سرجری کامیابی کے ساتھ انجام دی۔ یہ سرجری آیوشمان بھارت اسکیم کے تحت مفت کی گئی۔ مریض کی عمر 75 سال تھی۔

اسپتال کی جانب سے اتوار کو دی گئی اطلاع کے مطابق نئی روبوٹک ٹیکنالوجی کو مستقبل میں مزید جدید بنایا جا سکتا ہے۔ اس کے ذریعے مکمل اور جزوی گھٹنے کی تبدیلی کے ساتھ ساتھ کولہے کے جوڑ کی تبدیلی بھی کی جا سکے گی۔ تکنیکی اور سافٹ ویئر اپ گریڈ کے بعد روبوٹ کی مدد سے ریڑھ کی ہڈی کی سرجری کی سہولت بھی تیار کی جا سکتی ہے۔

روبوٹک ٹیکنالوجی کے ذریعے سرجری سے قبل زیادہ درست منصوبہ بندی کرنے اور امپلانٹ کی پوزیشن کے ساتھ جسم کے جوڑ کے توازن کو بہتر انداز میں طے کرنے میں مدد ملتی ہے۔ سرکاری اسپتال میں یہ سہولت دستیاب ہونے سے معاشی طور پر کمزور مریضوں کو جدید علاج فراہم ہونے کے امکانات بڑھ جائیں گے۔

یہ پہل وی ایم ایم سی اور صفدرجنگ اسپتال کی ڈائریکٹر کویتا شرما کی قیادت، تعاون اور حوصلہ افزائی میں انجام دی گئی۔ سرجری مرکزی ہڈیوں کے ادارے کے ڈائریکٹر پروفیسر ڈاکٹر سمت سورال کی طبی رہنمائی میں ہوئی۔ آپریشن ٹیم کی قیادت کنسلٹنٹ پروفیسر اور یونٹ سربراہ ڈاکٹر بھگوتی پرساد شرما نے کی۔ سرجری میں ڈاکٹر دھروے مینی اور ڈاکٹر کارتک یادو نے تعاون کیا۔ اینستھیزیا ٹیم کی قیادت ڈاکٹر سشیل گوریا نے کی۔ آپریشن تھیٹر کی نرسنگ ٹیم میں سسٹر ریکھا اور ریتیکا جبکہ تکنیکی ٹیم میں وجیندر شامل تھے۔

ہندوستھان سماچار

ہندوستان سماچار / عطاءاللہ