نئی دہلی، 21 اگست (ہ س)۔ مرکزی وزیر داخلہ امت شاہ اور وزیر دفاع راج ناتھ سنگھ سمیت کئی لیڈروں نے جمعہ کو اتر پردیش کے سابق وزیر اعلی کلیان سنگھ کو ان کی برسی پر خراج عقیدت پیش کیا۔

امت شاہ نے کہا، اتر پردیش کے سابق وزیر اعلی کلیان سنگھ کی برسی کے موقع پر میں انہیں خراج عقیدت پیش کرتا ہوں۔ اتر پردیش میں جرائم سے پاک انتظامیہ کا آغاز کرکے کلیان سنگھ نے ریاست میں اچھی حکمرانی کے لیے سمت متعین کی۔ اپنے اصولوں کے لیے اقتدار کی قربانی دینے والے بابوجی نے ثابت کیا کہ ان کے لیے قومی مفاد سب سے اہم ہے۔ تنظیم سے لے کر حکومت تک ان کی پوری زندگی ہر کارکن کے لیے باعث تحریک ہے۔

راج ناتھ سنگھ نے کہا کہ کلیان سنگھ ہندوستانی سیاست کے ایک مضبوط ستون اور ایک اصولی رہنما تھے۔ انہوں نے اپنی زندگی قومی مفاد، اچھی حکمرانی اور عوامی خدمت کے لیے وقف کر دی۔ انہوں نے اتر پردیش میں بھارتیہ جنتا پارٹی کے قیام اور اسے عوام تک پہنچانے میں اہم کردار ادا کیا۔

زراعت اور کسانوں کی بہبود کے مرکزی وزیر شیوراج سنگھ چوہان نے کہا، میں اتر پردیش کے سابق وزیر اعلی اور راجستھان اور ہماچل پردیش کے سابق گورنر پدم وبھوشن کلیان سنگھ، جو شری رام جنم بھومی تحریک کے اہم ستون تھے، کو ان کی برسی پر خراج عقیدت پیش کرتا ہوں۔ 'بابو جی' کو قوم کی ترقی کے لیے ان کی لگن اور معاشرے کی بے لوث خدمت کے لیے ہمیشہ یاد رکھا جائے گا۔

سماجی انصاف اور تفویض اختیارات کے مرکزی وزیر ڈاکٹر وریندر کمار نے کہا کہ 'پدم وبھوشن' سماجی و ثقافتی اقدار اور قوم کے لیے آپ کی وقف شدہ زندگی ہر فرد کے لیے ایک مثال ہے۔ معاشرے کے تمام طبقوں کی ترقی کے لیے آپ کی کوششیں ہمیشہ آنے والی نسلوں کو بھی تحریک دیں گی۔ ثقافت اور سیاحت کے مرکزی وزیر گجیندر سنگھ شیخاوت نے کہا، اتر پردیش کے سابق وزیر اعلی پدم وبھوشن کلیان سنگھ کو ان کی برسی پر خراج عقیدت۔

ہندوستھان سماچار

---------------

ہندوستان سماچار / عبدالسلام صدیقی