جموں, 2 اگست (ہ س): ضلع راجوری کی تحصیل تھانہ منڈی کے ساج گاؤں میں حالیہ سیلاب کے بعد دریا کا رخ تبدیل ہو کر آبادی کی طرف مڑ گیا ہے، جس کے باعث متعدد خاندان شدید خوف و ہراس میں مبتلا ہیں اور اپنے گھروں و جان و مال کے تحفظ کے حوالے سے فکرمند ہیں۔

اطلاعات کے مطابق ساج گاؤں کے وارڈ نمبر 7 میں دریا، جو پہلے گاؤں کے دوسری جانب بہتا تھا، حالیہ سیلاب کے دوران اپنا راستہ بدل کر رہائشی علاقے کے قریب پہنچ گیا۔ دریا کے تیز بہاؤ سے بعض مکانات کو جزوی نقصان پہنچا ہے، جبکہ گاؤں کی سینکڑوں کنال زرعی اراضی بھی کٹاؤ کی نذر ہو چکی ہے۔

مقامی باشندوں کا کہنا ہے کہ گزشتہ رات پانی کی سطح میں اضافے کے بعد خطرہ مزید بڑھ گیا ہے۔ ان کے مطابق اگر دریا کا بہاؤ اسی سمت برقرار رہا تو مزید کٹاؤ کے نتیجے میں متعدد مکانات منہدم ہونے اور انسانی جانوں کو خطرات لاحق ہونے کا اندیشہ ہے۔

علاقہ کے باشندوں نے ضلع انتظامیہ سے فوری مداخلت کی اپیل کرتے ہوئے مطالبہ کیا ہے کہ دریا کے بہاؤ کو اس کی سابقہ سمت میں موڑنے اور حفاظتی بند تعمیر کرنے سمیت مؤثر اقدامات کیے جائیں تاکہ مزید نقصان سے بچا جا سکے۔

ہندوستھان سماچار

---------------

ہندوستان سماچار / محمد اصغر