حیدرآباد ،2 اگست(ہ س)۔ منچریال ضلع کے بیلم پلی ٹاؤن میں واقع گورنمنٹ ٹرائبل چلڈرنز آشرم اسکول میں مبینہ طور پرآلودہ کھانا کھانے کے بعد سات طلبہ کی طبیعت خراب ہوگئی۔ اطلاعات کے مطابق اسکول میں کھانا کھانے کے بعد سات طلبہ نے طبیعت خراب ہونے کی شکایت کی۔ اس واقعے کے بعد اسکول میں طلبہ کی صحت اورفراہم کیے جانے والے کھانے کے معیارپرسوالات اٹھنے لگے ہیں۔ متاثرہ طلبہ کے والدین نے الزام عائد کیا کہ طبیعت خراب ہونے کے باوجود اسکول کے عملے نے انہیں بروقت ہاسپٹل منتقل کرنے کےلیے مناسب اقدامات نہیں کیے۔ والدین کے مطابق جب انہیں اپنے بچوں کی طبیعت خراب ہونے کاعلم ہواتووہ خوداسکول پہنچے اور متاثرہ طلبہ کوعلاج کے لیے ہاسپیٹل لے گئے۔ ہاسپیٹل میں طلبہ کو ضروری طبی امداد فراہم کی گئی۔ تاہم ان کی موجودہ صحت کے بارے میں حکام کی جانب سے باضابطہ تفصیلات سامنے نہیں آئی ہیں۔ اس واقعے پروالدین نے شدید برہمی کا اظہار کرتے ہوئے اسکول انتظامیہ کے مبینہ غفلت بھرے رویے کی شکایت کی اور معاملے کی مکمل تحقیقات کا مطالبہ کیا۔ والدین نے کہاکہ اگرکھانا تیار کرنے یا طلبہ کو فراہم کرنے میں کسی قسم کی لاپروائی سامنے آتی ہے تو ذمہ دار افراد کے خلاف سخت کارروائی کی جانی چاہیے۔ واقعے نے سرکاری رہائشی اور قبائلی بہبود کے اسکولوں میں طلبہ کو فراہم کیے جانے والے کھانے کے معیار اور حفظانِ صحت کے انتظامات پر بھی تشویش پیدا کردی ہے۔ حکام سے توقع کی جا رہی ہے کہ وہ اسکول میں فراہم کیے گئے کھانے اور طلبہ کی طبیعت خراب ہونے کی اصل وجہ کی تحقیقات کریں گے۔

ہندوستھان سماچار

ہندوستان سماچار / محمدعبدالخالق