نئی دہلی، 02 اگست (ہ س)۔ دہلی حکومت نے دارالحکومت کے ڈیزاسٹر مینجمنٹ سسٹم کو مضبوط کرنے اور برسوں سے خدمات انجام دینے والے ملازمین کو بڑی راحت دینے کے لیے ایک ٹھوس قدم اٹھایا ہے۔ ڈسٹرکٹ ڈیزاسٹر مینجمنٹ کے اہلکاروں کے اعزازیے (الاونس) میں 100 فیصد تک اضافے کا اعلان کیا گیا ہے، جس سے 16 سال کا انتظار ختم ہو گیا۔
وزیر اعلیٰ کے دفتر کے مطابق دہلی اسٹیٹ ڈیزاسٹر مینجمنٹ اتھارٹی (ڈی ایس ڈی ایم اے) کے تحت کام کرنے والے پروجیکٹ آفیسر، ڈسٹرکٹ پروجیکٹ آفیسر (ڈی پی او) اور پروجیکٹ کوآرڈینیٹر کے اعزازیے میں 100 فیصد تک اضافے کا اعلان کیا گیا ہے۔ یہ فیصلہ ان اہلکاروں کو انصاف دلانے کی سمت میں اٹھایا گیا ہے، جنہوں نے سال 2009 سے مسلسل دہلی کے ڈیزاسٹر مینجمنٹ سسٹم کی ریڑھ کی ہڈی بن کر کام کیا، لیکن گزشتہ 16 سالوں میں ان کے اعزازیے میں ایک بار بھی ترمیم نہیں ہوئی تھی۔
وزیر اعلیٰ ریکھا گپتا نے بتایا کہ تمام پہلووں کو مدنظر رکھتے ہوئے منظور شدہ نئے تنخواہی ڈھانچے کے تحت ان اہلکاروں کے اعزازیے میں 100 فیصد تک اضافے کی سفارش کر دی گئی ہے۔ یہ ترمیم کسی قسم عنایتی رقم نہیں، بلکہ ذمہ داریوں، تجربے، تکنیکی مہارت اور موجودہ حالات کے مطابق ایک منصفانہ اور مسابقتی تنخواہی ڈھانچہ یقینی بنانے کی سمت میں اٹھایا گیا قدم ہے۔
گپتا نے کہا کہ دیگر ریاستوں اور دہلی حکومت کے مختلف شعبوں کے مقابلے میں بھی ڈی ایس ڈی ایم اے کے ان عہدوں کا اعزازیہ کافی کم تھا۔ جہاں کرناٹک، مہاراشٹر اور اتر پردیش جیسی ریاستوں میں یکساں ذمہ داریاں نبھانے والے حکام کو تقریباً 45 ہزار روپے سے 50 ہزار روپے یا اس سے زیادہ کا اعزازیہ دیا جا رہا ہے، وہیں دہلی حکومت کے دیگر شعبوں میں بھی یکساں سطح کے کنٹریکٹ عہدوں کا معاوضہ کہیں زیادہ ہے۔
انہوں نے کہا کہ اعزازیے میں اضافے کے ساتھ ساتھ حکومت مستقبل میں اس کیڈر کو اور مضبوط کرنے کے لیے کئی ٹھوس اقدامات پر بھی غور کر رہی ہے۔ ان میں کارکردگی کی بنیاد پر سالانہ تنخواہ میں اضافے کا نظام، ملازمین اور ان کے خاندانوں کے لیے ہیلتھ انشورنس کور، جدید ڈیزاسٹر ٹیکنالوجی کے لیے خصوصی ورکشاپس اور تربیتی پروگرام شامل ہیں۔
وزیر اعلیٰ نے کہا کہ دہلی حکومت کا مقصد صرف تنخواہ بڑھانا نہیں بلکہ دارالحکومت کے ڈیزاسٹر مینجمنٹ سسٹم کو زیادہ اہل، جدید اور مستقبل کے چیلنجوں کے لیے تیار بنانا ہے۔ برسوں سے محدود اعزازیے پر کام کر رہے ہمارے ڈیزاسٹر مینجمنٹ حکام نے دہلی کی سیکورٹی کے لیے اہم تعاون دیا ہے۔ ان کے تجربے، مہارت اور لگن کا احترام کرنا ہماری ذمہ داری ہے۔ یہ فیصلہ نہ صرف ان کے ساتھ انصاف کرے گا، بلکہ تقریباً 3.2 کروڑ دہلی والوں کی سیکورٹی کو اور زیادہ مضبوط بنانے کی سمت میں بھی ایک اہم قدم ثابت ہوگا۔
ہندوستھان سماچار
---------------
ہندوستان سماچار / انظر حسن
