گلاسگو، یکم اگست (ہ س)۔ دولتِ مشترکہ کھیل 2026 میں بھارتی باکسروں کی شاندار کارکردگی کا سلسلہ جاری ہے۔ ہفتہ کے روز انکش پنگھال اور سچن سیواچ نے اپنے اپنے وزن کے زمروں میں طلائی تمغے جیت کر بھارت کی باکسنگ مہم کو نئی بلندیوں تک پہنچا دیا، جبکہ اولمپک تمغہ یافتہ لوولینا بورگوہائیں نے خواتین کے 75 کلوگرام زمرے میں چاندی کا تمغہ اپنے نام کیا۔ ان شاندار کامیابیوں کی بدولت بھارت تمغوں کی مجموعی درجہ بندی میں چوتھے مقام پر پہنچ گیا۔

مردوں کے 80 کلوگرام فائنل میں انکش پنگھال نے میزبان انگلینڈ کے شِٹو ڈیمیجی کو 4-1 کے اسپلٹ فیصلے سے شکست دے کر طلائی تمغہ حاصل کیا۔

پہلے راؤنڈ میں چند ججوں کے اسکور کارڈ پر پیچھے رہنے کے باوجود انکش نے دوسرے اور تیسرے راؤنڈ میں زبردست واپسی کی۔ جارحانہ پنچز، مؤثر کاؤنٹر اٹیک اور بہترین رنگ کنٹرول کی بدولت انہوں نے مقابلے کا رخ اپنے حق میں موڑ لیا۔

تین ججوں نے انہیں 29-26 سے فاتح قرار دیا، جبکہ دیگر دو ججوں نے 28-27 کا فیصلہ دیا، جن میں سے ایک نے انکش اور دوسرے نے انگلینڈ کے باکسر کے حق میں ووٹ دیا۔

مردوں کے 60 کلوگرام فائنل میں بھارت کے سچن سیواچ نے نمیبیا کے ٹرایاگین مورنی ندیویلو کو نہایت سخت اور سنسنی خیز مقابلے میں 3-2 کے اسپلٹ فیصلے سے شکست دے کر طلائی تمغہ اپنے نام کیا۔

تینوں راؤنڈز میں کانٹے کا مقابلہ دیکھنے کو ملا۔ سچن نے پورے مقابلے میں تحمل کا مظاہرہ کیا اور فیصلہ کن لمحات میں درست پنچ لگا کر ججوں کو متاثر کیا۔ آخر میں تین ججوں نے بھارتی باکسر کے حق میں فیصلہ دیا، جبکہ دو ججوں نے نمیبیا کے کھلاڑی کو بہتر قرار دیا۔

خواتین کے 75 کلوگرام فائنل میں بھارت کی اسٹار باکسر اور ٹوکیو اولمپکس کی کانسہ کی تمغہ یافتہ لوولینا بورگوہائیں کو آسٹریلیا کی ایما سو گرین ٹری کے خلاف 4-1 کے اسپلٹ فیصلے سے شکست کا سامنا کرنا پڑا۔

لوولینا نے پورے مقابلے میں بہترین جدوجہد کی اور کئی مؤثر پنچ بھی لگائے، تاہم ججوں نے آسٹریلوی باکسر کی جارحانہ حکمت عملی اور رنگ پر مضبوط کنٹرول کو زیادہ مؤثر قرار دیا۔ اس کے باوجود لوولینا نے چاندی کا تمغہ جیت کر بھارت کی تمغہ مہم میں اہم کردار ادا کیا۔

ہفتہ کے روز بھارتی باکسروں نے مجموعی طور پر نو تمغے جیتے، جن میں سات طلائی اور دو چاندی کے تمغے شامل ہیں۔ طلائی تمغہ جیتنے والوں میں انکش پنگھال، سچن سیواچ، اروندھتی چودھری، پریا، ساکشی، پریتی اور جیسمین شامل ہیں، جبکہ لوولینا بورگوہائیں اور جادومنی سنگھ نے چاندی کے تمغے حاصل کیے۔اس کے علاوہ مردوں کے ایف-57 شاٹ پٹ مقابلے میں بھارت نے پہلی اور دوسری پوزیشن حاصل کی، جبکہ جوڈو میں بھی کانسہ کا تمغہ جیتا۔ان کامیابیوں کی بدولت بھارت دولتِ مشترکہ کھیل 2026 کی تمغہ جاتی درجہ بندی میں چوتھے مقام پر پہنچ گیا ہے۔

اب تک بھارت کے کھاتے میں مجموعی طور پر 39 تمغے آ چکے ہیں، جن میں 13 طلائی، 17 چاندی اور 9 کانسہ کے تمغے شامل ہیں۔ باکسنگ میں ابھی بھی کئی بھارتی کھلاڑی فائنل میں پہنچ چکے ہیں، جس کے باعث تمغوں کی تعداد میں مزید اضافے کی امید ظاہر کی جا رہی ہے۔

ہندوستھان سماچار

ہندوستان سماچار / Mohammad Khan