جموں, 31 جولائی (ہ س)۔ مقبوضہ کشمیر سے بے گھر ہونے والے افراد نے جمعہ کے روز جموں میں احتجاجی مظاہرہ کرتے ہوئے حکومتِ ہند سے مطالبہ کیا کہ مقبوضہ علاقے کو پاکستان کے قبضے سے آزاد کرا کے بھارت میں شامل کیا جائے۔یہ احتجاج ایس او ایس انٹرنیشنل کے زیر اہتمام منعقد کیا گیا، جس کی قیادت تنظیم کے چیئرمین راجیو چنی نے کی۔ مظاہرین نے پاکستان اور اس کی فوج کے خلاف نعرے بازی کی اور پلے کارڈ اٹھا کر پی او جے کے کی آزادی کے حق میں آواز بلند کی۔اس موقع پر راجیو چنی نے الزام عائد کیا کہ پاکستان گزشتہ کئی دہائیوں سے پی او جے کے کے عوام کو بنیادی حقوق سے محروم رکھے ہوئے ہے اور وہاں کے قدرتی وسائل کا استحصال کیا جا رہا ہے، جبکہ مقامی آبادی کو اس کا کوئی خاطر خواہ فائدہ نہیں پہنچ رہا۔

انہوں نے کہا کہ اگر پی او جے کے واقعی ایک خودمختار خطہ ہے تو پھر پاکستان کی قومی سیاسی جماعتیں وہاں انتخابات میں حصہ کیوں لیتی ہیں۔ انہوں نے دعویٰ کیا کہ مقبوضہ علاقے کے عوام پاکستان کی پالیسیوں سے مایوس ہو چکے ہیں اور آزادی کے خواہاں ہیں۔راجیو چنی نے مرکزی حکومت سے مطالبہ کیا کہ پی او جے کے کو پاکستان کے قبضے سے آزاد کرانے کے لیے مؤثر اقدامات کیے جائیں تاکہ 1947 میں بے گھر ہونے والے خاندان اپنے آبائی علاقوں میں واپس جا سکیں۔

ہندوستھان سماچار

---------------

ہندوستان سماچار / محمد اصغر