لکھنؤ، 27 جولائی(ہ س)۔ بھارتی کرکٹ کنٹرول بورڈ (بی سی سی آئی) کے نائب صدر راجیو شکلا نے یو پی ٹی20 لیگ اور یو پی سی اے اسپیڈ ہنٹ مہم کی بھرپور ستائش کرتے ہوئے کہا ہے کہ اس ٹورنامنٹ نے اتر پردیش کے نوجوان کرکٹروں کو اپنی صلاحیتوں کے اظہار اور آگے بڑھنے کا بہترین پلیٹ فارم فراہم کیا ہے۔ انہوں نے کہا کہ اسپیڈ ہنٹ کے ذریعے ریاست بھر سے باصلاحیت فاسٹ بولرز کی شناخت کی گئی، جن میں اس بار 134 کلومیٹر فی گھنٹہ سے زیادہ رفتار سے مسلسل بولنگ کرنے والے 38 فاسٹ بولرز یو پی ٹی20 لیگ کی نیلامی تک پہنچے۔یو پی ٹی20 لیگ کا چوتھا سیزن 14 اگست سے شروع ہوگا، جس کا افتتاحی میچ کاشی رودراس اور میرٹھ ماورکس کے درمیان کھیلا جائے گا۔

اتر پردیش کرکٹ ایسوسی ایشن (یو پی سی اے) کی جانب سے پیر کو جاری بیان میں راجیو شکلا نے کہا کہ یو پی ٹی20 لیگ کے گزشتہ تین سیزن کے مثبت نتائج اب واضح طور پر سامنے آ رہے ہیں۔ انہوں نے بتایا کہ اس سال اتر پردیش کے 18 کھلاڑیوں نے انڈین پریمیئر لیگ (آئی پی ایل) میں حصہ لیا، جن میں سے کئی کو یو پی ٹی20 لیگ میں شاندار کارکردگی کے بعد شناخت ملی۔ ان کا کہنا تھا کہ آئی پی ایل فرنچائزز کے اسکاؤٹس مسلسل اس لیگ پر نظر رکھتے ہیں، جس کی وجہ سے یہ نوجوان کھلاڑیوں کے لیے قومی سطح تک پہنچنے کا ایک اہم ذریعہ بن گئی ہے۔

راجیو شکلا نے یو پی سی اے اسپیڈ ہنٹ کی کامیابی کا ذکر کرتے ہوئے کہا کہ اس مہم نے ریاست کے دور دراز علاقوں سے بھی باصلاحیت فاسٹ بولرز کو سامنے لانے میں اہم کردار ادا کیا ہے۔ انہوں نے تجویز دی کہ ہر فرنچائز کو اپنے ان کیپڈ کھلاڑیوں میں کم از کم ایک کھلاڑی اسپیڈ ہنٹ پروگرام سے ضرور شامل کرنا چاہیے۔

لیگ کے مستقبل میں توسیع کے حوالے سے انہوں نے کہا کہ فی الحال چھ ٹیموں پر مشتمل لیگ کامیابی سے مستحکم ہو چکی ہے۔ اگر مستقبل میں گورننگ کونسل ٹیموں کی تعداد بڑھانے کی سفارش کرتی ہے تو ایپیکس کونسل اس پر سنجیدگی سے غور کرے گی۔ ان کے مطابق اولین ترجیح ایک مضبوط اور پائیدار لیگ قائم کرنا رہی ہے۔

انہوں نے مزید کہا کہ یو پی سی اے کا مقصد اتر پردیش کے زیادہ سے زیادہ شہروں تک کرکٹ کو فروغ دینا ہے۔ اسی سوچ کے تحت اس بار کھلاڑیوں کی نیلامی آگرہ میں منعقد کی گئی، جس سے شہر کے کرکٹ ڈھانچے کو مزید مضبوطی ملنے کی امید ہے۔ انہوں نے کہا کہ جیسے جیسے ریاست میں بہتر کرکٹ انفراسٹرکچر تیار ہوگا، لیگ کے دائرہ کار کو بھی وسعت دی جائے گی۔

یو پی ٹی20 لیگ کے چوتھے سیزن کی افتتاحی تقریب اور ابتدائی مرحلے کے مقابلے بھارت رتن شری اٹل بہاری واجپئی ایکانا کرکٹ اسٹیڈیم، لکھنؤ میں کھیلے جائیں گے۔ اس کے بعد ٹورنامنٹ گرین پارک اسٹیڈیم، کانپور منتقل ہوگا، جہاں باقی لیگ میچوں کے ساتھ ساتھ پلے آف اور فائنل بھی منعقد کیے جائیں گے۔

کوالیفائر-1 اور ایلیمنیٹر میچ 3 ستمبر، کوالیفائر-2 4 ستمبر جبکہ فائنل اور اختتامی تقریب 6 ستمبر کو کانپور میں ہوگی۔24 دن تک جاری رہنے والے اس ٹورنامنٹ میں مجموعی طور پر 34 میچ کھیلے جائیں گے، جن میں 13 ڈبل ہیڈر اور 8 سنگل ہیڈر مقابلے شامل ہوں گے، جہاں اتر پردیش کے بہترین کرکٹرز چمپئن بننے کے لیے مدمقابل ہوں گے۔

ہندوستھان سماچار

ہندوستان سماچار / Mohammad Khan