حیدرآباد، 20 جولائی (ہ س)۔

ٹرینی آئی پی ایس آفیسر ادے کرشنا ریڈی، جنہیں نیشنل پولیس اکیڈمی (این پی اے)، حیدرآباد میں ایک ساتھی ٹرینی کی جنسی ہراسانی کے الزامات کا سامنا ہے، نے اتوار کی رات مبینہ طور پر خودکشی کی کوشش کی۔ انہیں حیدرآباد کے ایس آر نگر کے ایک پرائیویٹ اسپتال لے جایا گیا جہاں اس کی حالت تشویشناک بتائی جاتی ہے۔

یہ واقعہ ان رپورٹوں کے سامنے آنے کے ایک دن بعد پیش آیا ہے کہ نیشنل پولیس اکیڈمی (این پی اے) کی ایک اندرونی تحقیقاتی کمیٹی نے پہلی نظر میں ان کے خلاف الزامات کو درست پایا ہے۔ این پی اے کی داخلی کمیٹی نے پہلے سی سی ٹی وی فوٹیج اور دیگر شواہد کی جانچ کی، جس میں ساتھی خاتون ٹرینی افسر کے الزامات کی تصدیق ہوئی۔

اس تحقیقات کے بعد اکیڈمی نے ادے کرشنا ریڈی کو معطل کر دیا۔ پولیس نے انہیں اس کیس کے سلسلے میں نوٹس بھی جاری کیا۔

اتوار کو مبینہ خودکشی کی کوشش سے پہلے، ادے کرشنا ریڈی نے مبینہ طور پر ایک واٹس ایپ اسٹیٹس پوسٹ کیا تھا جس میں دعویٰ کیا گیا تھا کہ اس نے کچھ غلط نہیں کیا ہے۔

قابل ذکر ہے کہ کرناٹک سے تعلق رکھنے والی 30 سالہ شادی شدہ ٹرینی آئی پی ایس افسر نے اپنی شکایت میں الزام لگایا ہے کہ ادے کرشنا ریڈی نے اسے فحش پیغامات بھیجے، اسے ایک کمرے میں گھسیٹا، اس کے بال پکڑ کر اس پر حملہ کیا، اس کا گلا گھونٹنے کی کوشش کی، اسے چاقو سے دھمکی دی، اور خفیہ طور پر اس کا نجی ویڈیو ریکارڈ کیا۔

انہوںنے یہ بھی الزام لگایا کہ ادے نے اس کے شوہر کو ویڈیو بھیجا اور اسے بلیک میل کیا۔ اس شکایت کی بنیاد پر پولیس نے ادے کرشنا ریڈی کے خلاف تعزیرات ہند (آئی پی سی) اور انفارمیشن ٹیکنالوجی (آئی ٹی) ایکٹ کی کئی دفعات کے تحت مقدمہ درج کیا ہے۔ کیس کی تفتیش جاری ہے۔

تلنگانہ پولیس میں کانسٹیبل کے طور پر کام کرنے والے ادے کرشنا ریڈی کو آئی پی ایس کے لیے منتخب ہونے پر بڑے پیمانے پر پذیرائی ملی اور سرخیوں میں آئے۔ اس بار وہ ہراسانی کے الزامات کی وجہ سے خبروں میں ہیں۔

ہندوستھان سماچار

ہندوستان سماچار / عطاءاللہ