نئی دہلی، 20 جولائی (ہ س)۔ پارلیمنٹ کے مانسون اجلاس کا پہلا دن پیر کو اپوزیشن کے ہنگامہ آرائی سے متاثر ہوا۔ لوک سبھا اور راجیہ سبھا کی کارروائی بار بار اپوزیشن کے مسلسل احتجاج کی وجہ سے متاثر ہوئی جس میں مختلف مسائل ، بشمول رام مندر میں پرساد کی مبینہ چوری، نیٹ اور دیگر امتحانات میں پیپر لیک ہونا اور جنتر منتر پر طلباءکے احتجاج پر بات چیت کا مطالبہ کیا گیا۔ بالآخر دونوں ایوانوں کی کارروائی منگل کی صبح تک ملتوی کر دی گئی۔

اس دوران، سپریم کورٹ (ججوں کی تعداد) ترمیمی بل، 2026، جو سپریم کورٹ میں ججوں کی تعداد 33 سے بڑھا کر 37 کرنے کی کوشش ہے، لوک سبھا میں پیش کیا گیا۔ وہیںوندے ماترم کو قومی ترانے کی طرح احترام دینے کا مطالبہ کرنے والا ایک بل راجیہ سبھا میں پیش نہیں ہو سکا۔

مختلف تنظیموں کے احتجاج کے باعث پارلیمنٹ کی عمارت کی طرف جانے والے راستوں پر ٹریفک متاثر ہونے کے باعث پارلیمنٹ کمپلیکس کے باہر سیکورٹی سخت رہی۔

لوک سبھا کی کارروائی شروع ہوتے ہی اسپیکر نے قطر کے سابق امیر شیخ حمد بن خلیفہ الثانی سمیت چھ سابق ارکان کے انتقال پر تعزیت کا اظہار کیا۔ خراج عقیدت پیش کرنے کے بعد ایوان کی کارروائی پہلے دوپہر 12 بجے تک ملتوی کر دی گئی اور پھر تین مختصر وقفوں کے بعد سہ پہر تین بجے تک کے لیے ملتوی کر دی گئی۔ اس دوران مرکزی وزیر قانون و انصاف ارجن رام میگھوال نے سپریم کورٹ کے ججوں کی تعداد بڑھانے کے لیے ایک ترمیمی بل ایوان میں پیش کیا۔

اس دوران، مانسون اجلاس کے پہلے دن راجیہ سبھا کے نو منتخب ارکان نے حلف لیا۔ ان میں گجرات سے مکیش بھائی جے راٹھوا، کرناٹک سے پون کھیڑا، مدھیہ پردیش سے مہیش کیوٹ، میگھالیہ سے جیمز پانگسانگ کونگکل سنگما، میزورم سے کھیانگٹے لالتلواگکیما، راجستھان سے ستیش پونیا اور مغربی بنگال سے پرکاش چک برائیک، سشمیتا دیو، اور سکھیندو شیکھررائے شامل ہیں۔

چیئرمین سی پی رادھا کرشنن نے سابق ممبران بلبیر پنج، سواپن سدھن بوس (ٹوٹو بوس)، رنگاسائی رام کرشنا اور ایچ ہنومنتھپا کے انتقال پر تعزیت کی اور قطر کے سابق امیر کو بھی خراج عقیدت پیش کیا۔

خراج عقیدت پیش کرنے کے بعد، قائد حزب اختلاف ملکارجن کھڑگے نے جنتر منتر پر احتجاج کرنے والے طلبہ پر مبینہ لاٹھی چارج اور این ای ای ٹی اور دیگر امتحانی پرچوں کے لیک ہونے کا مسئلہ اٹھایا اور ان موضوعات پر فوری بحث کا مطالبہ کیا۔ اپوزیشن ارکان کے ہنگامہ آرائی کی وجہ سے راجیہ سبھا کی کارروائی پہلے دوپہر 12 بجے، پھر12:30 بجے، پھر12: 50 بجے، پھر دوپہر 2 بجے اور پھر 2:30 بجے تک ملتوی کردی گئی۔

دوپہر کو جب کارروائی دوبارہ شروع ہوئی تو ڈپٹی چیئرمین ہری ونش نے ارکان سے ایوان کے وقار کو برقرار رکھنے کی اپیل کرتے ہوئے کہا کہ پارلیمنٹ بات چیت اور بحث کا ایک فورم ہے اور دن بھر کوئی قانون سازی کا کام نہیں چل سکتا۔ تاہم ہنگامہ آرائی جاری رہنے پر انہوں نے ایوان کی کارروائی منگل کی صبح 11 بجے تک ملتوی کر دی۔

ہندوستھان سماچار

---------------

ہندوستان سماچار / عبدالسلام صدیقی