نئی دہلی، 19 جولائی (ہ س): نرموہی اکھاڑہ نے سپریم کورٹ میں ایک عرضی دائر کی ہے جس میں ایودھیا میں رام مندر کا انتظام کرنے والے شری رام جنم بھومی تیرتھ چھیتر ٹرسٹ کی تشکیل نو کی درخواست کی گئی ہے۔ درخواست میں جائیداد کی منتقلی اور ٹرسٹ بورڈ کے ذریعہ کئے گئے مالیاتی لین دین کے فارنسک آڈٹ کا مطالبہ کیا گیا ہے۔

یہ عرضی شری رام جنم بھومی مندر کو دیے گئے عطیات کی مبینہ چوری کی حالیہ رپورٹوں کے بعد کی گئی ہے۔ نرموہی اکھاڑا نے یہ بھی درخواست کی ہے کہ 1950 اور 1982 سے موجود مورتیوں کو اس وقت مندر میں نصب نئی مورتی کی جگہ پر دوبارہ نصب کیا جائے۔ یہ عرضی اس مقدمے کے تناظر میں دائر کی گئی ہے جس کا فیصلہ پانچ ججوں کی آئینی بنچ نے کیا تھا۔

نرموہی اکھاڑہ نے اپنی عرضی میں کہا ہے کہ رام مندر سے متعلق سپریم کورٹ کے 2019 کے فیصلے کو صحیح معنوں میں لاگو نہیں کیا گیا۔ ایک پرائیویٹ ٹرسٹ تشکیل دیا گیا تھا جس میں کچھ نامزد اور سابق ممبران شامل تھے، اور یہ ممکن ہے کہ ان میں سے کچھ افراد نے دیوتا کے اثاثوں کا غلط استعمال کیا ہو۔

13 جولائی کو، مندر میں چڑھاوے کی مبینہ چوری کی سی بی آئی کی زیرقیادت خصوصی تحقیقاتی ٹیم (ایس آئی ٹی) سے تحقیقات کی درخواست کی سماعت کرتے ہوئے، سپریم کورٹ نے ٹرسٹ اور اتر پردیش حکومت کو نوٹس جاری کیا۔ جسٹس سوریہ کانت کی قیادت والی بنچ نے ایس آئی ٹی کی تشکیل سے متعلق ریکارڈ طلب کیا تھا۔ اس معاملے کی سماعت 20 جولائی کو ہونے والی ہے۔

ہندوستھان سماچار

---------------

ہندوستان سماچار / عبدالواحد