نئی دہلی، 26 جون (ہ س)۔ 1975 میں ہندوستان میں نافذ ایمرجنسی کی 51 ویں برسی کے موقع پر،مہاراشٹرا اور گوا کے سابق گورنر اور اتراکھنڈ کے سابق وزیر اعلیٰ بھگت سنگھ کوشیاری نے ٹیگورہال، فیکلٹی آف آرٹس، دہلی یونیورسٹی میں ڈی یو کے پروفیسر سدھیرسنگھ کی کتاب ڈیموکریسی اینڈ ہیومن رائٹس ان انڈیا: ریفلیکشنز آن ایمرجنسی (1975–1977) کااجرا کیا۔

اس موقع پر دہلی یونیورسٹی کے وائس چانسلر پروفیسر یوگیش سنگھ مہمان خصوصی کے طور پر موجود تھے۔

یہ کتاب ایمرجنسی (1975تا1977) کا تنقیدی تجزیہ پیش کرتی ہے۔ اس میں تاریخی اور نظریاتی نقطہ نظر سے آئینی اداروں، شہری آزادیوں، جمہوری طرز حکمرانی اور انسانی حقوق پر اس کے اثرات کا جائزہ لیاگیا ہے۔

وائس چانسلر پروفیسر یوگیش سنگھ نے جمہوری اقدار کے تحفظ میں تاریخی یادداشت کی اہمیت پر زور دیا۔ انہوں نے کہا کہ نوجوان نسل کے لیے ہندوستانی جمہوریت کے اس سیاہ باب کو سمجھنا بہت ضروری ہے۔ اس کتاب کا اجراءایک پرانے زخم کو دوبارہ کریدنے کے مترادف ہے، لیکن جو قوم اپنے زخموں کو بھول جاتی ہے وہ انہیں دہرانے کا خطرہ مول لیتی ہے۔

ایمرجنسی کے دوران اپنے ذاتی تجربات کا اشتراک کرتے ہوئے، بھگت سنگھ کوشیاری، جنہوں نے اس عرصے کے دوران کئی ماہ جیل میں گزارے، کہا کہ 25 جون کو آئین کے قتل کے دن کے طور پر یاد کیا جانا چاہیے۔ یہ ہندوستانی جمہوریت کی تاریخ کا ایک سیاہ باب ہے اور آنے والی نسلوں کو اس کے سبق کو ہمیشہ یاد رکھنا چاہیے۔

ڈاکٹر سدھیر سنگھ نے کہا کہ انیس مہینوں تک ہندوستانی جمہوریت تاریکی میں ڈوبی ہوئی تھی۔ ریاستی طاقت کو عدلیہ سمیت جمہوری اداروں کے خلاف استعمال کیا گیا۔ کوٹیلیہ کے مطابق، کسی بھی سیاسی نظام کی بنیاد صرف انصاف پرمبنی حکمرانی ہے۔ ایمرجنسی کا نفاذ جمہوری اقدار پر سنگین حملہ تھا۔

ڈاکٹر سدھیر سنگھ نے حال ہی میں دہلی یونیورسٹی کے شعبہ سیاسیات میں بطور پروفیسر شمولیت اختیار کی ہے۔ وہ ایک ممتاز اسکالر ہیں اور انہوں نے پانچ کتابیں تصنیف اور تئیس کتابوںکی تدوین کی ہے اور قومی اور بین الاقوامی جرائد میں ترانوے مقالے شائع ہوئے ہیں۔

پروگرام میں کئی نامور ماہرین تعلیم اور دانشور موجود تھے، جن میں پروفیسر بھارتی شرما، پروفیسر بی کے۔ سنگھ، پروفیسر ایم رحمت اللہ، پروفیسر کمار آشوتوش، پروفیسر رنجنا مکھوپادھیائے، پروفیسر پریرنا ملہوترا، ڈاکٹر کامکھیا تیواری، پروفیسر اے ایس۔ یارونگم، پروفیسر روی پرکاش ٹیک چندانی، ڈی یو ٹی اے کے صدر پروفیسر وی ایس۔ نیگی اور ڈاکٹر روپیش چوہان شامل ہیں۔

---------------

ہندوستان سماچار / عبدالسلام صدیقی