نئی دہلی، 27 جون (ہ س)۔ وزیر اعظم نریندر مودی ہفتے کے روز مشرقی افریقی ملک سیشلز کے لئے دہلی سے روانہ ہوئے۔ وہ اس ملک کے تین روزہ سرکاری دورے (27 سے 29 جون تک ) پر ہیں۔

وزارت خارجہ کے مطابق وزیر اعظم مودی کا یہ دورہ سیشلز صدر ڈاکٹر پیٹرک ہرمینی کی دعوت پر ہو رہا ہے۔ سیشلز اپنے قومی دن کی گولڈن جوبلی (50 ویں سالگرہ) منا رہا ہے، جس میں وہ بطور مہمان خصوصی شرکت کریں گے۔ وزیر اعظم مودی نے اس سے قبل 2015 میں سیشلز کا دورہ کیا تھا۔

دورے کے دوران، وزیر اعظم مودی سیشلز کے صدر ہرمینی سے ملاقات کریں گے۔ دونوں قائدین ہندوستان-سیشلز تعاون کے تمام شعبوں کا جائزہ لیں گے اور علاقائی اور بین الاقوامی مسائل پر اپنے خیالات کا تبادلہ کریں گے۔

اس دورے کے دوران وزیر اعظم مودی سیشلز کی قومی اسمبلی سے بھی خطاب کریں گے۔ وہ اس اجتماع سے خطاب کرنے والے پہلے ہندوستانی وزیر اعظم ہوں گے۔ وہ وہاں مقیم ہندوستانی برادری کے ارکان سے بھی ملاقات کریں گے۔ اس دورے کو ہندوستان اور سیشلز کے درمیان مضبوط دوستی، سمندری تعاون اور باہمی شراکت داری کو مضبوط کرنے کی سمت ایک اہم قدم سمجھا جاتا ہے۔

وزیر اعظم کے دفتر کے مطابق، روانگی سے قبل اپنے بیان میں وزیر اعظم مودی نے کہا، ”سیشلز ایک اہم سمندری پڑوسی ہے اور سمندروں کے لیے ہمارے وژن اور عالمی جنوب کے لیے ہماری مشترکہ وابستگی میں ایک کلیدی شراکت دار ہے۔ اس سال ہم اپنے سفارتی تعلقات کے قیام کی 50 ویں سالگرہ بھی منا رہے ہیں، جو باہمی اعتماد، مشترکہ جمہوری اقدار اور ہمارے عوام کے درمیان گہرے احترام پر مبنی ہیں۔“

انہوں نے کہاکہ صدر ہرمینی کے فروری 2026 میں ہندوستان کے کامیاب سرکاری دورے کے موقع پر، میں اپنی دیرپا دوستی کو مزید مضبوط بنانے کے لیے ہماری بات چیت کا منتظر ہوں۔ ہم اپنے ملک کے لوگوں کی ترقی کو آگے بڑھانے اور بحر ہند کے علاقے میں سلامتی اور خوشحالی کو فروغ دینے کے لیے مل کر کام کریں گے۔ اس دورے کے دوران، مجھے قومی اسمبلی سے خطاب کرنے والے پہلے ہندوستانی وزیر اعظم بننے کا اعزاز حاصل ہو گا۔ یہ تاریخی موقع ہمارے دونوں ملکوں کو جوڑنے والی مضبوط جمہوریہ اقدار اور پارلیمانی روایات کی عکاسی کرتا ہے۔

وزیر اعظم نے کہا کہ وہ سیشلز میں متحرک ہندوستانی برادری کے ساتھ بات چیت کرنے کے بھی منتظر ہیں، جس نے نسلوں سے خصوصی ہندوستان-سیشلز دوستی کو پروان چڑھایا ہے اور ہمارے دونوں ممالک کے درمیان ایک زندہ پل کا کام کر رہے ہیں۔ انہیں یقین ہے کہ ان کا دورہ دونوں ممالک کے درمیان دیرینہ تعلقات کو مزید گہرا کرے گا، بحر ہند کے علاقے میں بحری تعاون کو فروغ دے گا اور ایک محفوظ، پرامن اور خوشحال بحرہند کے خطے کے ہمارے مشترکہ وژن کو آگے بڑھائے گا۔

ہندوستھان سماچار

ہندوستان سماچار / محمد شہزاد