گوہاٹی، 27 جون (ہ س)۔ آسام کے محکمہ جنگلات نے نایاب اور محفوظ ہارن بل کے غیر قانونی شکار میں ملوث تین افراد کو گرفتار کرکے ایک اہم کامیابی حاصل کی ہے۔ اس اقدام کو جنگلی حیات کے تحفظ کی جانب ایک اہم قدم قرار دیا جا رہا ہے۔

اطلاعات کے مطابق، تینوں ملزمان کو ڈگبوئی فاریسٹ ڈویژن کے تحت مارگریٹا ایسٹ رینج کے علاقے میں خفیہ اطلاع کی بنیاد پر شروع کی گئی کارروائی کے بعد گرفتار کیا گیا۔ ابتدائی تحقیقات سے معلوم ہوا ہے کہ ملزمان طویل عرصے سے محفوظ ہارن بل کے غیر قانونی شکار میں ملوث تھے۔ خفیہ اطلاع پر کارروائی کرتے ہوئے محکمہ جنگلات نے انہیں پکڑ لیا۔

ریاست کے جنگلات اور ماحولیات کے وزیر جینتا مالا برووا نے سوشل میڈیا کے ذریعے آپریشن کی تفصیلات شیئر کیں۔ ڈگبوئی فاریسٹ ڈویژن کی ٹیم کو ان کی تیز رفتار کارروائی کے لیے سراہتے ہوئے، انہوں نے کہا کہ آسام حکومت جنگلی حیات اور جنگلات کو نقصان پہنچانے والے کسی بھی مجرم کے خلاف صفر رواداری کی پالیسی برقرار رکھتی ہے۔

محکمہ جنگلات نے تینوں ملزمان کے خلاف وائلڈ لائف پروٹیکشن ایکٹ کے تحت مقدمہ درج کر کے تفتیش شروع کر دی ہے۔ حکام اس بات کی بھی چھان بین کر رہے ہیں کہ آیا اس گروہ کے کسی بین ریاستی جنگلی حیات کی اسمگلنگ کے نیٹ ورکس سے روابط ہیں۔

ہندوستھان سماچار

---------------

ہندوستان سماچار / عبدالواحد