چندی گڑھ، 13جون (ہ س)۔ گزشتہ 36 گھنٹوں کے دوران گرج چمک اور تیز ہواوں نےپنجاب کے مختلف حصوں میں بجلی کے بنیادی ڈھانچے کو بڑے پیمانے پر نقصان پہنچایا ہے۔ اس کے نتیجے میں کئی علاقوں میں بجلی کی فراہمی متاثر ہوئی اور پنجاب اسٹیٹ پاور کارپوریشن لمیٹڈ کو کروڑوں روپے کا نقصان اٹھانا پڑا۔
ابتدائی تخمینوں کے مطابق، طوفان کی وجہ سے 8,492 سے زیادہ بجلی کے کھمبے، 1,466 ٹرانسفارمرز، تقریبا 4 کلومیٹر ہائی ٹینشن کیبلز اور 220 کلومیٹر سے زیادہ لو ٹینشن تاروں کو نقصان پہنچا ہے۔ بجلی کے دیگر آلات اور ڈھانچے کو بھی نقصان پہنچا ہے۔ پی ایس پی سی ایل کو تقریبا 19.54 کروڑ روپے کا نقصان ہوا ہے۔اسے حالیہ برسوں کے سب سے بڑے نقصانات میں سے ایک سمجھا جا رہا ہے۔ ریاست کے سرحدی اور وسطی علاقوں میں سب سے زیادہ نقصان ریکارڈ کیا گیا ہے۔پی ایس پی سی ایل حکام کے مطابق تیز ہواوں کی وجہ سے بڑی تعداد میں بجلی کے کھمبے، ٹرانسفارمر اور درخت اکھڑ گئے جس کی وجہ سے کئی علاقوں میں بجلی منقطع ہوگئی۔ کئی علاقوں میں لوگوں کو 10 گھنٹے سے زیادہ وقت تک بجلی منقطع رہنے کا سامنا کرنا پڑا۔ محکمے کو بھی بڑی تعداد میں شکایات موصول ہوئیں۔ایک سینئر عہدیدار نے بتایا کہ شدید طوفان کی وجہ سے 220 کے وی کی سپلائی لائنیں اور ٹرانسفارمرز کو بھی نقصان پہنچا ہے۔ انہوں نے کہا کہ محکمہ کی ٹیمیں مرمت کے کام میں مسلسل مصروف ہیں اور زیادہ تر متاثرہ علاقوں میں بجلی بحال کر دی گئی ہے جبکہ باقی علاقوں میں جلد سپلائی بحال کر دی جائے گی۔
بجلی کے شعبے کے ماہرین نے بدلتے موسم اور موسمیاتی تبدیلی کی وجہ سے اس طرح کے واقعات میں اضافے کے پیش نظر بجلی کے بنیادی ڈھانچے کو مضبوط کرنے کی ضرورت پر زور دیا ہے۔ ماہرین کا کہنا ہے کہ پہلے ایسے طوفان دو سال میں ایک بار آتے تھے لیکن گزشتہ تین سالوں سے وہ سال میں دو سے تین بار بھاری نقصان پہنچا رہے ہیں۔طوفان کا اثر بجلی کی طلب پر بھی پڑا۔ جمعرات کی شام پنجاب میں بجلی کی طلب اچانک 14,000 میگاواٹ سے کم ہو کر تقریبا 3,170 میگاواٹ رہ گئی، جس کی وجہ سے گرڈ سے 3,700 میگاواٹ بجلی کم نکالی گئی۔ مانگ میں زبردست کمی کی وجہ سے پی ایس پی سی ایل کو گرڈ کے استحکام کو برقرار رکھنے کے لیے تھرمل یونٹوں کی پیداوار کو کم کرنا پڑا۔تاہم حالیہ بارشوں سے دھان کے موسم میں بھی کچھ راحت ملی ہے۔ انجینئروں کے مطابق بارش سے اگلے چند دنوں تک ٹیوب ویلوں کا استعمال کم ہو سکتا ہے جس سے بجلی کی طلب بھی متاثر ہوگی۔
---------------
ہندوستان سماچار / عبدالسلام صدیقی
