ایم پی اسمبلی میں تین ریاستوں کے نوجوان ارکان اسمبلی کی دو روزہ کانفرنس پیر سے

بھوپال، 28 مارچ (ہ س)۔ مدھیہ پردیش اسمبلی میں نوجوان ارکان اسمبلی کی دو روزہ کانفرنس پیر، 30 مارچ سے اسمبلی کے قانون ساز کونسل ہال میں منعقد کی جا رہی ہے۔ اس کانفرنس میں کامن ویلتھ پارلیمانی ایسوسی ایشن (انڈیا ریجن 6) کی تین ریاستوں مدھیہ پردیش کے 18، چھتیس گڑھ کے 15 اور راجستھان کے 22 نوجوان ارکان اسمبلی شرکت کریں گے۔

اسمبلی کے انڈر سکریٹری نریندر مشرا نے ہفتہ کو بتایا کہ نوجوان ارکان اسمبلی کی کانفرنس کا افتتاح پیر، 30 مارچ کو ہوگا۔ افتتاحی پروگرام میں مدھیہ پردیش کے وزیراعلیٰ ڈاکٹر موہن یادو، مدھیہ پردیش اسمبلی کے اسپیکر نریندر سنگھ تومر، راجستھان اسمبلی کے اسپیکر واسودیو دیونانی اور چھتیس گڑھ اسمبلی کے اسپیکر ڈاکٹر رمن سنگھ موجود رہیں گے۔

انہوں نے بتایا کہ کانفرنس کے پہلے دن ’جمہوریت اور شہریوں کی شرکت کو مضبوط بنانے کے لیے نوجوان ارکان اسمبلی کا کردار‘ کے موضوع پر غورو خوض ہوگا۔ پہلے دن ماکھن لال چترویدی نیشنل یونیورسٹی آف جرنلزم کے وائس چانسلر وجے منوہر تیواری بھی نوجوان ارکان اسمبلی سے خطاب کریں گے۔

کانفرنس کے دوسرے دن 31 مارچ کو ’ترقی یافتہ ہندوستان 2047 – نوجوان ارکان اسمبلی کی ذمہ داریاں اور چیلنجز‘ کے موضوع پر تبادلہ خیال ہوگا۔ اس دن دیگر سیشنز کے علاوہ ایم آئی ٹی پونہ کے چیئرمین ڈاکٹر راہل وی کراڈ کا خطاب ہوگا۔ اختتامی تقریب میں راجیہ سبھا کے ڈپٹی چیئرمین ہری ونش موجود رہیں گے۔

اس پروگرام میں مدھیہ پردیش کے پارلیمانی امور کے وزیر کیلاش وجے ورگیہ اور حزب اختلاف رہنما امنگ سنگھار مہمانِ خصوصی کے طور پر شرکت کریں گے۔

ہندوستھان سماچار

---------------

ہندوستان سماچار / انظر حسن