نئی دہلی، 28 مارچ (ہ س)۔ آندھرا پردیش کے وشاکھاپٹنم سے دہلی جانے والی انڈیگو کی پرواز کو ہفتے کی صبح تکنیکی خرابی کی وجہ سے اندرا گاندھی بین الاقوامی ہوائی اڈے پر ہنگامی لینڈنگ کرنا پڑی۔ جہاز میں سوار تمام 161 مسافر اور عملہ محفوظ ہے۔ فائر فائٹرز کو صبح 10:53 بجے ایمرجنسی کے بارے میں کال موصول ہوئی، جس کے بعد رن وے پر پانچ گاڑیاں تعینات کر دی گئیں۔

دہلی پولیس کے مطابق انڈیگو کی ایک پرواز وشاکھاپٹنم سے دہلی کے لیے اڑ رہی تھی کہ اس کے انجن میں خرابی ہوئی۔ طیارہ اندرا گاندھی بین الاقوامی ہوائی اڈے پر بحفاظت اتر گیا۔ انڈیگو کی پرواز نمبر 6ای 579 صبح 8:39 بجے وشاکھاپٹنم سے دہلی کے لیے روانہ ہوئی۔ دوران پرواز طیارے کے انجن میں اچانک تکنیکی خرابی پیدا ہوگئی۔ طیارے کے ایک انجن کے فیل ہونے کی اطلاع ملتے ہی مسافروں میں خوف و ہراس پھیل گیا۔ صورتحال کی سنگینی کو محسوس کرتے ہوئے پائلٹ نے فوری طور پر دہلی ایئر ٹریفک کنٹرول کو مطلع کیا، جس کے بعد اندرا گاندھی بین الاقوامی ہوائی اڈے پر ہنگامی پروٹوکول کو فعال کر دیا گیا۔ حفاظتی وجوہات کی بنائ پر رن ??وے نمبر 28 کو کلیئر کر کے ہائی الرٹ کر دیا گیا۔

پائلٹ طیارے کو متوازن رکھتے ہوئے سنگل انجن کی مدد سے طیارے کو بحفاظت لینڈ کرنے میں کامیاب رہا۔ جیسے ہی طیارے نے زمین کو چھوا، تمام 161 مسافروں اور عملے کے دس ارکان نے راحت کی سانس لی۔ انڈیگو کے ترجمان نے اس واقعے پر ایک بیان میں کہا، لینڈنگ سے کچھ دیر پہلے تکنیکی خرابی کا پتہ چلا۔ معیاری آپریٹنگ طریقہ کار کے مطابق، پائلٹس نے ترجیحی لینڈنگ کی درخواست کی اور طیارہ بحفاظت لینڈ کر گیا۔ فی الحال، طیارے کا ضروری معائنہ اور دیکھ بھال جاری ہے۔

ہندوستھان سماچار

ہندوستان سماچار / Mohammad Khan