نئی دہلی، 28 مارچ (ہ س)۔ وزارت قانون و انصاف اتوار کو وگیان بھون میں 'ٹیلی لا' اقدام کے تحت ایک عظیم الشان قومی مشاورت کا اہتمام کرے گی۔ اس کا بنیادی مقصد ٹیکنالوجی کے ذریعے قانونی خدمات کو مضبوط بنانا اور آخری میل پر کھڑے شخص کے لیے انصاف تک رسائی کو یقینی بنانا ہے۔ وزارت کے مطابق اس قومی مشاورت کے مہمان خصوصی نائب صدر سی پی رادھا کرشنن ہوں گے۔ قانون و انصاف کے وزیر مملکت (آزادانہ چارج) ارجن رام میگھوال دیگر معززین کے ساتھ اس تقریب میں مہمان اعزازی کے طور پر موجود ہوں گے۔ یہ مشاورت 'دشا' اسکیم کے تحت منعقد کی جا رہی ہے، جس میں ڈیجیٹل بااختیار بنانے کی کئی نئی جہتیں متعارف کرائی جائیں گی۔ ایونٹ کے دوران، 'نیا سیٹو' (برج آف جسٹس) کے نام سے ایک اے آئی سے چلنے والی چیٹ بوٹ اور اس کے لوگوکی نقاب کشائی کی جائے گی۔ یہ ایک ڈیجیٹل پل کے طور پر کام کرے گا، شہریوں کو ان کے قانونی حقوق کو سمجھنے اور تنازعات کے حل کے طریقہ کار تک رسائی میں مدد فراہم کرے گا۔

سال 26-2025 کے لیے ایک خصوصی کتابچہ جاری کیا جائے گا، جس کا عنوان فائدہ مندوں کی آواز ہے۔ یہ ان افراد کی متاثر کن کہانیاں مرتب کرتا ہے جنہوں نے ٹیلی لا سروسز سے فائدہ اٹھایا۔ نوجوانوں اور دیہی آبادی کے لیے پیچیدہ قانونی تصورات کو آسان بنانے کے لیے نیشنل لاء یونیورسٹی ، دہلی کے تعاون سے تیار کردہ مزاحیہ کتابوں کا ایک سلسلہ بھی جاری کیا جائے گا۔ قومی گیت 'وندے ماترم' کی 150ویں سالگرہ کے موقع پر مقامی فنکاروں کی طرف سے ایک خصوصی ثقافتی پرفارمنس پیش کی جائے گی۔ مشاورت کے دوران، ملک بھر سے ٹیلی لا پینل کے وکلاء کے ساتھ براہ راست بات چیت کی جائے گی۔ اسکے علاوہ ایک خصوصی سیشن دہلی کے ممتاز لاء کالجوں کی طرف سے فراہم کی جانے والی مفت قانونی خدمات کے لیے وقف کیا جائے گا۔

یہ قومی مشاورت نظام انصاف کے حصول میں در پیش عدم مساوات کو دور کرنے اور ٹیکنالوجی کے ذریعے 'انصاف سب کے لیے' کے عزم کو عملی جامہ پہنانے کی جانب ایک انقلابی قدم ہے۔

ہندوستھان سماچار

---------------

ہندوستان سماچار / عبدالواحد