ممبئی ، 26 مارچ (ہ س)۔ وزیر اعلیٰ دیویندر فڑنویس نے معروف تاریخ داں ڈاکٹر جے سنگراؤ پوار کے انتقال پر گہرے رنج و غم کا اظہار کرتے ہوئے کہا ہے کہ ان کے انتقال سے مہاراشٹر تاریخ وتحقیق کے ایک اصول پسند اور گہرے علم رکھنے والے رہنما سے محروم ہو گیا ہے۔اپنے تعزیتی پیغام میں انہوں نے کہا کہ ڈاکٹر پوار نے اپنی تحقیقی اور مدلل پیشکش کے ذریعے نئی نسل کے لیے شیواجی اور شاہو مہاراج کی تاریخ کو ایک قیمتی سرمایہ بنا کر پیش کیا۔ انہوں نے اپنی پوری زندگی تاریخ کی تحقیق اور مطالعہ کے لیے وقف کر رکھی تھی۔وزیر اعلیٰ کے مطابق ڈاکٹر پوار نے چھترپتی شیواجی مہاراج اور راجارشی چھترپتی شاہو مہاراج کی شخصیات کو مختلف زاویوں سے پیش کیا اور تاریخی تحقیق کو نئی جہت دی۔ خاص طور پر شیواجی یونیورسٹی کے شاہو ریسرچ سینٹر کے ذریعے انہوں نے تحقیقاتی منصوبوں اور تاریخ نویسی کو فروغ دیا۔انہوں نے مزید کہا کہ ڈاکٹر پوار کی کوششوں کے نتیجے میں شیو چرتر کے ساتھ ساتھ چھترپتی سمبھاجی مہاراج، ججاؤ ماساہب، مہارانی تارارانی اور راجارشی شاہو مہاراج سے متعلق وافر تحقیقی مواد تیار ہوا، جو آج مہاراشٹر کے لیے ایک اہم علمی سرمایہ ہے۔فڑنویس نے کہا کہ ڈاکٹر پوار کی پہل سے راجارشی شاہو مہاراج کے کام کو انگریزی سمیت دیگر غیر ملکی اور ہندوستانی زبانوں میں بھی پہنچایا گیا، جس سے ان کی خدمات عالمی سطح پر متعارف ہوئیں۔انہوں نے اس موقع پر کہا کہ ڈاکٹر پوار کے انتقال سے نہ صرف ریاست بلکہ ان کے اہلِ خانہ اور شاگردوں کو بھی بڑا صدمہ پہنچا ہے اور حکومت ان کے دکھ میں برابر کی شریک ہے۔وزیر اعلیٰ دیویندر فڑنویس نے ڈاکٹر جے سنگراؤ پوار کو خراجِ عقیدت پیش کرتے ہوئے انہیں ایک عظیم محقق اور رہنما قرار دیا۔

ہندوستھان سماچار

--------------------

ہندوستان سماچار / جاوید این اے