نئی دہلی، 26 مارچ (ہ س)۔ پٹرولیم اور قدرتی گیس کی وزارت، حکومت ہند کی ہدایات کے مطابق عمل کرتے ہوئے، دہلی حکومت نے تجارتی ایل پی جی سلنڈروں کی مختص کو 20 فیصد سے بڑھا کر 50 فیصد کر دیا ہے۔ یہ مختص اب 1,800 سے بڑھ کر 4,500 سلنڈر (19 کلوگرام) یومیہ ہو گیا ہے۔ یہ بڑھتی ہوئی سپلائی فوری طور پر نافذ ہو گئی ہے اور اس بات کو یقینی بنائے گی کہ ضروری خدمات، ہوٹلوں، صنعتوں اور تارکین وطن کارکنوں کی ضروریات کو بغیر کسی رکاوٹ کے پورا کیا جائے۔

خوراک اور فراہمی کے وزیر منجندر سنگھ سرسا نے وزیر اعظم نریندر مودی اور مرکزی حکومت کا شکریہ ادا کیا۔ انہوں نے کہا، ہم وزیر اعظم مودی کی ان کی دور اندیش قیادت کے لیے شکریہ ادا کرتے ہیں۔ ان کی رہنمائی میں بروقت کیے گئے فیصلوں کی بدولت، دہلی میں کمرشل ایل پی جی کی سپلائی کے سلسلے میں کوئی مشکلات نہیں ہوں گی۔

نئے انتظام کے تحت ایل پی جی کی تقسیم کو سات بڑے زمروں میں تقسیم کیا گیا ہے، جس کے لیے کل 4,500 سلنڈر (19 کلوگرام) یومیہ مختص کیے گئے ہیں۔

زمرہ 1: ضروری خدمات (اسکول، ہسپتال، بس ٹرمینلز، ریلوے، ہوائی اڈے) - 225 سلنڈر (5 فیصد)۔

زمرہ 2: سرکاری ادارے، پی ایس یو، صنعتی کینٹین، کمیونٹی کچن - 225 سلنڈر (5 فیصد)۔

زمرہ 3: ہوٹل، ریستوراں، ڈھابے، فوڈ پروسیسنگ یونٹس، ڈیریز - 3,375 سلنڈر (75 فیصد)۔

زمرہ 4: کیٹرنگ اور ضیافتیں - 225 سلنڈر (5 فیصد)۔

زمرہ 5: چھوٹی صنعتیں (ڈرائی کلیننگ، پیکجنگ، فارماسیوٹیکل) – 45 سلنڈر (1 فیصد)۔

زمرہ 6: کھیلوں کی سہولیات، اسٹیڈیم وغیرہ۔ 225 سلنڈر (5 فیصد)۔

زمرہ 7: پردیسی مزدور (5 کلو سلنڈر) – 684 سلنڈر (4 فیصد)۔

سپلائی مرکزی حکومت کے ضوابط کے مطابق کی جا رہی ہے، جو ضروری شعبوں کو ترجیح دیتے ہوئے پچھلے تین مہینوں کی اوسط کھپت کو بیس لائن کے طور پر استعمال کرتی ہے۔ انہوں نے بتایا کہ ذخیرہ اندوزی اور بلیک مارکیٹنگ کو روکنے کے لیے محکمہ وزن اور خوراک اور سپلائی محکمہ کے افسران پر مشتمل 70 مشترکہ ٹیمیں دہلی بھر میں معائنہ کر رہی ہیں۔ خلاف ورزی کرنے والوں کے خلاف ضروری اشیاءایکٹ 1955 ایل پی جی ڈسٹری بیوشن آرڈر، 2000؛ اور بھارتیہ نیا ئے سنہتا، 2024 کے تحت سخت کارروائی کی جائے گی۔۔

وزیر سرسا نے تصدیق کی کہ صورتحال پوری طرح قابو میں ہے۔ سپلائی معمول کے مطابق ہے، اور تقسیم بغیر کسی رکاوٹ کے جاری ہے۔ انہوں نے کہا، ”میں دہلی کے لوگوں سے اپیل کرتا ہوں کہ وہ کسی بھی افواہ پر دھیان نہ دیں اور نہ ہی ان کو پھیلائیں۔“ انہوں نے مزید کہا کہ محکمہ سپلائرز اور آئی جی ایل کے ساتھ مسلسل رابطے میں ہے۔

---------------

ہندوستان سماچار / عبدالسلام صدیقی