رانچی، 20 فروری(ہ س)۔ جھارکھنڈ کی سہیا بہنوں کو یوم خواتین کے موقع پرایک سال کی24,000 روپے کی یک مشت ادائیگی کی جائے گی۔ ریاستی وزیر صحت ڈاکٹر عرفان انصاری نے جمعہ کو جھارکھنڈ اسمبلی کے بجٹ اجلاس کے تیسرے دن یہ اعلان کیا۔ وہ ایم ایل اے نرمل مہتو کے ایک سوال کا جواب دے رہے تھے۔

نرمل مہتو نے ایوان میں کہا کہ ریاست کی آشا بہنیں اپنے مطالبات کے لیے اسمبلی کے باہر احتجاج کر رہی ہیں اور انہیں باقاعدہ ادائیگیاں نہیں مل رہی ہیں۔ انہوں نے حکومت سے اس سلسلے میں فوری کارروائی کا مطالبہ کیا۔

بجٹ اجلاس کے دوران ایم ایل اے سریو رائے نے مشرقی سنگھ بھوم ضلع کے جمشید پور کے ایم جی ایم اسپتال میں پانی کے سنگین مسئلہ کا مسئلہ اٹھایا۔ انہوں نے کہا کہ اسپتال کا افتتاح پانی کی مناسب فراہمی کے بغیر کر دیاگیا جس کے نتیجے میں کئی بار آپریشن تک ملتوی کرنے پڑے ۔

اس پر وزیر صحت عرفان انصاری نے کہا کہ اسپتال میں پانی کی فراہمی کے لیے ضروری فنڈز دستیاب کرادیئے گئے ہیں اور فی الحال متبادل ذرائع سے پانی فراہم کیا جارہا ہے۔ایم ایل اے پورنیما دیوی نے بھی کہا کہ خواتین کو اسپتال میں علاج کے دوران کافی مشکلات کا سامنا کرنا پڑ رہا ہے اور کئی بنیادی سہولیات کا فقدان ہے۔

وزیر صحت نے کہا کہ محکمہ اسپتال کے مسائل سے پوری طرح آگاہ ہے اور پانی کی مستقل فراہمی کو یقینی بنانے کے لیے واٹر ٹریٹمنٹ پلانٹ لگایا جا رہا ہے۔ انہوں نے یقین دلایا کہ آئندہ چھ ماہ کے اندر ایم جی ایم اسپتال میں پانی کی فراہمی کا مستقل نظام قائم کر دیا جائے گا۔

انہوں نے یہ بھی واضح کیا کہ اگر کہیں بھی خواتین کا علاج مناسب انتظامات کے بغیر کیا جا رہا ہے تو متعلقہ اہلکاروں کے خلاف سخت کارروائی کی جائے گی۔

جگسلائی کے ایم ایل اے منگل کالندی نے مشورہ دیا کہ علاقے کے تمام ایم ایل اے مل کر کو ٹاٹا اسٹیل کے تعاون سے ڈمنا جھیل سے اسپتال تک پانی کی فراہمی کے لئے کوشش کریں ۔

ایم ایل اے کے سوال کا جواب دیتے ہوئے وزیر صحت نے کہا کہ سہیا بہنوں کی ادائیگی اور ایم جی ایم اسپتال کے پانی کے مسئلہ سمیت تمام مسائل کو ترجیحی بنیادوں پر حل کیا جائے گا، تاکہ صحت کی خدمات کو بہتر بنایا جا سکے اور مریضوں اور ہیلتھ ورکرز کو بہتر سہولیات مل سکیں۔

ہندوستھا ن سماچار

ہندوستان سماچار / محمد شہزاد