نئی دہلی، 20 فروری (ہ س)۔ کلاس 10 اور 12 کے سی بی ایس ای بورڈ کے امتحانات 17 فروری سے 10 اپریل 2026 تک منعقد ہو رہے ہیں۔ امتحان کے دوران طلباءکی سہولت کو مدنظر رکھتے ہوئے دہلی میٹرو ریل کارپوریشن (ڈی ایم آر سی) نے خصوصی انتظامات کا اعلان کیا ہے تاکہ طلباء کو امتحانی مرکز تک پہنچنے میں کسی قسم کی پریشانی کا سامنا نہ کرنا پڑے۔

ڈی ایم آر سی کے مطابق امتحان کے دنوں میں لاکھوں طلباء پورے شہر میں میٹرو سے سفر کرتے ہیں۔ بڑھتی ہوئی بھیڑ کو دیکھتے ہوئے ڈی ایم آر سی نے سی آئی ایس ایف کے ساتھ مل کر اسٹیشنوں پر خصوصی سہولیات نافذ کرنے کا فیصلہ کیا ہے۔ اعلان کردہ انتظامات کے تحت سی بی ایس ای ایڈمٹ کارڈ رکھنے والے طلباءکو سیکورٹی چیک کے دوران ترجیح دی جائے گی۔ مزید برآں، ٹکٹ آفسز اور کسٹمر سروس سینٹرز میں اپنے ایڈمٹ کارڈ پیش کرنے والے طلباءکو پہلے ٹکٹ جاری کیے جائیں گے۔ میٹرو اسٹیشنوں پر طلباءکی رہنمائی اور سہولت کے لیے خصوصی مرکزی اعلانات بھی کیے جائیں گے، جس سے وہ وقت پر اپنے امتحانی مراکز تک پہنچ سکیں گے۔ ڈی ایم آر سی کے پرنسپل ایگزیکٹو ڈائریکٹر انوج دیال نے کہا کہ امتحان کے دوران طلباءکو آسان، محفوظ اور بغیر کسی رکاوٹ کے سفر فراہم کرنا میٹرو انتظامیہ کی ترجیح ہے۔

انہوں نے والدین سے بھی اپیل کی کہ طلباء وقت سے پہلے گھر سے نکل جائیں اور ایڈمٹ کارڈ ساتھ رکھنا نہ بھولیں۔

---------------

ہندوستان سماچار / عبدالسلام صدیقی