کولکاتا، 19 فروری (ہ س)۔ شمالی بنگال کے دارجلنگ پہاڑی علاقے کے کرسیونگ سے بی جے پی کے ایم ایل اے وشنو پرساد شرما جمعرات کو ترنمول کانگریس میں شامل ہو گئے۔ انہوں نے کولکاتا کے ترنمول بھون میں پارٹی پرچم پکڑ کر باضابطہ طور پر حکمراں پارٹی میں شمولیت اختیار کی۔ اس موقع پر وزراءششی پاپنجا اور براتیہ باسو موجود تھے۔

وشنو پرساد شرما گزشتہ دو برسوں سے بی جے پی سے ناراض چل رہے تھے اور کئی بار عوامی طور پر پارٹی کے خلاف بول چکے تھے۔ یہاں تک کہ انہوں نے 2024 کے لوک سبھا انتخابات میں دارجلنگ سیٹ سے راجو بشٹ کو پھر سے امیدوار بنائے جانے کی مخالفت میں انہوں نے آزاد امیدوار کے طور الیکشن لڑا تھا۔ اس کے بعد سے ان کی پارٹی سے دوری مسلسل بڑھتی گئی۔

بی جے پی کے ساتھ اپنے اختلافات کے باوجود، وہ ریاست کے اپوزیشن لیڈرشبھیندو ادھیکاری سے رابطے میں رہے۔ ان کی بیماری کے دوران شبھیندو ادھیکاری نے ذاتی طور پر ان کے علاج میں مدد کی۔ اس وقت شبھیندو نے کہا تھا کہ وشنو پرساد شرما پارٹی سے ناراض ہو سکتے ہیں، لیکن وہ ترنمول کانگریس میں شامل نہیں ہوں گے۔ تاہم اب انہوں نے ترنمول کانگریس میں شامل ہو کر اس قیاس کو غلط ثابت کر دیا ہے۔

اگلے ماہ ہونے والے راجیہ سبھا انتخابات سے عین قبل ان کی ترنمول کانگریس میں شمولیت کو بی جے پی کے لیے ایک دھچکے کے طور پر دیکھا جا رہا ہے۔ ان کے جانے سے ریاستی اسمبلی میں بی جے پی کے ایم ایل اے کی تعداد کم ہو کر 64 ہو گئی ہے۔ راجیہ سبھا انتخابات میں ممبران اسمبلی کا انتخاب ایم ایل اے کے ووٹوں کی بنیاد پر کیا جاتا ہے، جس سے بی جے پی کی تشویش بڑھ سکتی ہے۔

علیحدہ گورکھا لینڈ ریاست کے دیرینہ حامی وشنو پرساد شرما اپنے قریبی لوگوں کو بتاتے تھے کہ بی جے پی نے گورکھا لینڈ کے معاملے پر ان کے ساتھ دھوکہ کیا ہے۔ذرائع کے مطابق گزشتہ ایک سال سے وہ اسمبلی میں بی جے پی کے پارٹی دفتر تک نہیں گئے تھے اور پارٹی پروگراموں سے دور رہتے تھے۔ وہ اسمبلی اجلاسوں کے دوران بی جے پی ایم ایل اے کے ساتھ بیٹھتے تھے، لیکن وہ کسی پروگرام میں حصہ نہیں لیتے تھے۔

ہندوستھان سماچار

ہندوستان سماچار / محمد شہزاد