سیوان، 19 فروری (ہ س)۔ حسین گنج بازارواقع میٹرک امتحان مرکز کے باہر بدھ کی رات 8 بجے کے قریب اس وقت افراتفری مچ گئی، جب ایک امیدوار کے مبینہ اغوا کی افواہ پھیل گئی۔ افواہ سنتے ہی امیدوار مشتعل ہوگئے اور امتحان مرکز کے باہر احتجاج کرنے لگے۔ صورتحال تیزی سے بگڑ گئی اور کچھ دکانوں میں توڑ پھوڑ بھی کی گئی۔

واقعہ ایم ایس ہائی اسکول کے باہر پیش آیا جہاں میٹرک کا امتحان مرکز قائم تھا۔ رپورٹ بتاتی ہیں کہ دوسری شفٹ میں ریاضی کا امتحان دینے والا ایک طالب علم امتحان کے بعد اپنے ہم جماعتوں کو بتائے بغیر چلا گیا اور اپنا موبائل فون بند کر دیا۔ شام کو جب اس کے اہل خانہ نے اس سے رابطہ کرنے کی کوشش کی تو اس کا موبائل فون بند تھا۔ اس کے بعد اہل خانہ اس کی تلاش میں حسین گنج گئے لیکن وہ کہیں نہیں ملا۔ اسی دوران ایک نامعلوم شخص نے یہ افواہ پھیلائی کہ کچھ لوگ موٹر سائیکل پر آئے اور طالب علم کو اغوا کر لیا۔ جیسے ہی یہ خبر پھیلی، امتحان مرکز کے باہر موجود طلبامشتعل ہوگئے۔ مشتعل طلباء نے بازار میں احتجاج شروع کر دیا اور کچھ دکانوں میں توڑ پھوڑ بھی کی۔

اطلاع ملتے ہی حسین گنج تھانہ کے پولیس افسران طلبہ کو سمجھا کر حالات کو قابو میں کیا گیا۔ بعد میں پولیس نے لاپتہ طالب علم کو جی بی نگر تھانہ علاقہ سے برآمد کرلیا۔

پولیس سپرنٹنڈنٹ پورن کمار جھا نے بتایا کہ طالب علم محفوظ ہے اور اس سے پوچھ گچھ کی جارہی ہے۔ ابتدائی تفتیش میں پتہ چلا کہ وہ ریاضی سوالنامہ میں اچھا نہ کرنے کی وجہ سے کہیں چلا گیا تھا۔

پولیس بازار میں توڑ پھوڑ کے واقعہ کو سنجیدگی سے لے رہی ہے اور ملوث افراد کے خلاف ایف آئی آر درج کرنے کی تیاری کر رہی ہے۔ فی الحال صورتحال نارمل بتائی جاتی ہے۔

ہندوستھان سماچار

ہندوستان سماچار / Mohammad Afzal Hassan