علی گڑھ, 18 فروری (ہ س) 4 تھیٹر ٹیم نے جامعہ ہمدرد میں یوم یونانی تقریبات 2026 کے موقع پر ایک اردو مزاحیہ و طنزیہ ڈرامہ پیش کیا۔ اس پروگرام کا اہتمام اسکول آف یونانی میڈیکل ایجوکیشن اینڈ ریسرچ، جامعہ ہمدرد کی جانب سے کیا گیا تھا۔

”زباں دراز“کے عنوان سے پیش کیے گئے اس ڈرامے کی کہانی مرزا لسان سنبھلوی نامی کردار کے گرد گھومتی ہے، جو زبان و ادب کا شیدائی ہے اور اپنے بیٹوں کے ساتھ خیالی دنیا میں مگن رہتا ہے، جبکہ اس کی حقیقت پسند بیوی انہیں عملی زندگی اختیار کرنے اور روزگار کمانے کی تلقین کرتی ہے۔ مزاح اور طنز کے ذریعے ڈرامے میں خاندانی تعلقات کے مختلف پہلوؤں کو اجاگر کرتے ہوئے اردو زبان و ثقافت کی دلکشی کو بھی نمایاں کیا گیا۔

یہ ڈرامہ پروفیسر ایف ایس شیرانی، اجمل خاں طبیہ کالج، اے ایم یو نے تحریر کیا ہے، جنہوں نے مرکزی کردار مرزا لسان سنبھلوی کا کردار بھی ادا کیا۔ اس کی ہدایت کاری مزمل حیات بھوانی نے کی جبکہ رشبھ راجپوت اسسٹنٹ ڈائریکٹر تھے۔ پروگرام کے کنوینر پروفیسر خورشید احمد انصاری تھے۔

تقریب میں بطور مہمانانِ خصوصی پروفیسر انور حسین خان، ڈین سمیر یونانی اسکول، جامعہ ہمدرد؛ کرنل طاہر مصطفیٰ، رجسٹرار؛ پروفیسر فرہاد بشیر، سینئر پروفیسر ماس کمیونیکیشن؛ اور پروفیسر زینت اقبال شریک ہوئے۔

ڈرامے میں اریبہ عقیل (بیگم)، یامن (رازی)، فلک رضا (شوبھا)، نبیل مصطفیٰ (گیلانی)، امیت کمار (اقبال)، ضمیر بخش (قربان)، عبداللہ فیضُل (رشدی)، عریب زبیری (صوفی)، آکاش (کیمرہ مین) اور صوفیہ مرزا (شمع) نے کردار نبھائے۔ فلک رضا نے پروڈکشن ہیڈ کی ذمہ داری بھی نبھائی، جبکہ گیتیکا شرما نے شعبہ تعلقاتِ عامہ کی سربراہی کی۔ فقیہہ خان، آکاش، محمد سعد شجاع اور عریب زبیری پروڈکشن ٹیم کا حصہ رہے۔

کرنل طاہر مصطفیٰ نے ٹیم کو اسناد پیش کرتے ہوئے مبارکباد اور نیک تمناؤں کا اظہار کیا۔

---------------

ہندوستان سماچار / سید کامران علی گڑھ