راجستھان میں شدید سردی کا قہر : 23 اضلاع میں کوہرے-سرد لہر کا الرٹ، 27 اضلاع میں اسکول بند
جے پور، 08 جنوری (ہ س)۔ راجستھان میں سردی نے اپنی خوفناک شکل دکھانا شروع کر دیا ہے۔ جمعرات کو ریاست کے 23 اضلاع میں گھنے کوہرے اور سرد لہر کو لے کر وارننگ جاری کی گئی ہے۔ محکمہ موسمیات نے سیکر، جھنجھنو، جے پور سمیت 10 اضلاع کے لیے اورینج الرٹ، جبکہ شری گنگا نگر، ہنومان گڑھ، بیکانیر سمیت 13 اضلاع میں یلو الرٹ کا اعلان کیا ہے۔
شدید سردی کے باعث ریاست کے 27 اضلاع میں جمعرات کو بھی اسکولوں میں چھٹی رکھی گئی ہے۔ وہیں جودھپور ضلع میں سرکاری اور نجی اسکولوں کا وقت بدل کر صبح 10 بجے سے شام 04 بجے تک کر دیا گیا ہے۔ ریاست میں حالات ایسے ہیں کہ دن میں بھی رات جیسی سردی محسوس ہو رہی ہے۔
محکمہ موسمیات جے پور کے مطابق، بدھ کو شری گنگا نگر میں دن کا زیادہ سے زیادہ درجہ حرارت محض 10.4 ڈگری سیلسیس رہا، جو چتوڑ گڑھ اور ڈونگر پور کے رات کے کم از کم درجہ حرارت کے برابر رہا۔
دارالحکومت جے پور بھی اس دوران شیخاوٹی کے فتح پور (سیکر)، پلانی (جھنجھنو) اور چورو سے زیادہ ٹھنڈی رہی۔ موسمیاتی ماہرین نے وارننگ دی ہے کہ اگلے چار سے پانچ دنوں تک ریاست میں کڑاکے کی سردی کا دور جاری رہ سکتا ہے۔
سیکر ضلع کے فتح پور میں جمعرات کو گھنا کوہرا چھایا رہا، جس سے دہلی-بیکانیر نیشنل ہائی وے پر ویزیبلٹی گھٹ کر محض 60 میٹر رہ گئی۔ زرعی تحقیقی مرکز میں کم از کم درجہ حرارت 4.5 ڈگری سیلسیس درج کیا گیا۔ زرعی تحقیقی مرکز کے موسمیاتی ماہر ڈاکٹر نریندر پاریک کے مطابق اگلے پانچ دنوں میں موسم صاف ہونے کے بعد کم از کم درجہ حرارت میں پانچ سے چھ ڈگری سیلسیس تک اور گراوٹ آ سکتی ہے۔ فتح پور میں فی الحال ٹھنڈ سے راحت ملنے کے آثار نہیں ہیں۔
کوٹ پوتلی-بہروڑ کے بہروڑ علاقے میں بدھ کی رات سے ہی کوہرا چھانا شروع ہو گیا تھا، جو جمعرات کی صبح تک گھنا ہو گیا۔ نیشنل ہائی وے-48 سمیت اسٹیٹ ہائی وے پر ویزیبلٹی 100 میٹر تک سمٹ گئی، جس سے گاڑی چلانے والوں کو پریشانی کا سامنا کرنا پڑا۔ کوہرے کے سبب جے پور-دہلی روٹ کی ٹرینیں 30 سے 40 منٹ کی تاخیر سے چل رہی ہیں۔ علاقے میں رات کا کم از کم درجہ حرارت 06 ڈگری سیلسیس تک پہنچ گیا۔
بدھ کو شری گنگا نگر کے علاوہ بیکانیر میں 13.5، باراں میں 14.3، کوٹہ میں 14.9، بھیلواڑہ اور چورو میں 15.5، کرولی میں 15.6، جھنجھنو میں 16.6، سروہی میں 16.1، پلانی میں 16.7، الور میں 16.8 اور ونستھلی (ٹونک) میں 16.2 ڈگری سیلسیس زیادہ سے زیادہ درجہ حرارت درج کیا گیا۔ ان سبھی شہروں میں کولڈ ڈے کی صورتحال بنی رہی۔
گزشتہ 24 گھنٹوں کے دوران بیکانیر، جے پور، بھرت پور، اجمیر، کوٹہ ڈویژن کے سبھی اضلاع نیز ادے پور اور جودھپور ڈویژن کے کچھ حصوں میں گھنا کوہرا چھایا رہا۔ جے پور اور کوٹہ ڈویژن کے کئی علاقوں میں صبح ویزیبلٹی 50 میٹر سے بھی کم درج کی گئی۔ اس کے ساتھ ہی کئی اضلاع میں دن بھر سرد ہوائیں چلتی رہیں۔
ہندوستھان سماچار
---------------
ہندوستان سماچار / انظر حسن
