حیدرآباد، 7۔ جنوری (ہ س)۔ سنکرانتی کے تہوار کے موقع پر اپنے آبائی گھروں کوجانے والے مسافروں کے لئے آندھراپردیش اسٹیٹ روڈ ٹرانسپورٹ کارپوریشن نے ایک بڑااعلان کیاہے۔

پرائیویٹ بسوں کی جانب سے وصول کئے جانے والے بھاری کرایوں سے عوام کو راحت دلانے اس مرتبہ ریکارڈ تعداد میں خصوصی بسیں چلانے کا فیصلہ کیا گیا ہے۔ کارپوریشن نے واضح کیا ہے کہ ماضی کے برعکس اس سال خصوصی بسوں کے کرایوں میں کوئی اضافہ نہیں کیا جائے گا اور حکومت کی ہدایت کے مطابق عام کرائے ہی لاگو ہوں گے۔آرٹی سی کی جانب سے مجموعی طور پر 8,432 خصوصی بس سروسس چلائی جائیں گی۔ ان میں سے 2,432 بسیں بین ریاستی سروسس کے طور پر حیدرآباد، چینئی اور بنگلور جیسے بڑے شہروں سے چلیں گی جن میں حیدرآباد کے لئے 240، بنگلور کے لئے 102 اور چینئی کے لئے 15 خصوصی بسیں شامل ہیں۔ اس کے علاوہ تقریباً 71 فیصد بسیں آندھرا پردیش کے اندرونی شہروں اور دیہی علاقوں کے درمیان چلائی جائیں گی۔دیہی علاقوں میں مسافروں کی سہولت کے لئے خصوصی طور پر 6,000 بسیں چلائی جائیں گی تاکہ لوگ آسانی کے ساتھ اپنے گھروں تک پہنچ سکیں۔ریاست میں جاری استری شکتی اسکیم کے تحت خواتین کے لئے بسوں میں مفت سفر کی سہولت برقرار رہے گی جس کے باعث مسافروں کی تعداد میں اضافہ کا امکان ہے اسی لئے بسوں کی تعداد میں خاطر خواہ اضافہ کیا گیا ہے۔اس موقع پر تلنگانہ اسٹیٹ روڈ ٹرانسپورٹ کارپوریشن بھی اے پی ایس آرٹی سی کے ساتھ تعاون کرتے ہوئے حیدرآباد سے آندھرا پردیش کے مختلف مقامات اور تلنگانہ کے اندرونی اضلاع کے لئے سینکڑوں خصوصی بسیں چلا رہی ہے۔پرائیویٹ ٹراویلس کی جانب سے وصول کئے جانے والے ہزاروں روپے کے کرایوں کے مقابلہ میں آر ٹی سی کا یہ فیصلہ عام آدمی کے لئے سنکرانتی کے موقع پر راحت ثابت ہوگا۔

ہندوستھان سماچار

ہندوستان سماچار / محمدعبدالخالق