لداخ ایک بار پھر جموں و کشمیر کا حصہ بنے گا۔ جاوید رانا

جموں، 06 جنوری (ہ س)۔ کابینہ وزیر جاوید رانا نے منگل کے روز کہا کہ وہ دن دور نہیں جب لداخ ایک بار پھر جموں و کشمیر کا حصہ بنے گا، کیونکہ متحدہ جموں و کشمیر ناگزیر ہے۔ صحافیوں سے گفتگو کرتے ہوئے جاوید رانا نے کہا کہ حکومتِ ہند کو بالآخر متحدہ جموں و کشمیر کی بحالی کے سوا کوئی اور راستہ نہیں بچے گا۔ انہوں نے بی جے پی کے ایک ایم ایل اے کی جانب سے جموں کو الگ ریاست بنانے سے متعلق دیے گئے بیانات کو خیالی اور گمراہ کن قرار دیتے ہوئے مسترد کر دیا۔

کابینہ وزیر نے کہا کہ پیر پنجال اور چناب خطوں سے جموں کو علیحدہ ریاست بنانے کا کوئی مطالبہ سامنے نہیں آیا ہے۔ ان کے مطابق ان علاقوں کے عوام آج بھی خود کو متحدہ جموں و کشمیر سے وابستہ سمجھتے ہیں اور کسی بھی قسم کی تقسیم کے حق میں نہیں ہیں۔

تاریخی پس منظر کا حوالہ دیتے ہوئے جاوید رانا نے کہا کہ جموں و کشمیر ماضی میں ایک مکمل ریاست تھی، جس کے کچھ حصے بعد میں پاکستان اور چین کے قبضے میں چلے گئے، جبکہ لداخ کو بعد ازاں الگ کر دیا گیا۔ انہوں نے یقین ظاہر کیا کہ سیاسی حالات میں تبدیلی آئے گی اور لداخ دوبارہ جموں و کشمیر کا حصہ بنے گا۔ انہوں نے کہا کہ تاریخ اور زمینی حقائق کو ہمیشہ کے لیے تبدیل نہیں کیا جا سکتا اور اس بات پر اعتماد ظاہر کیا کہ عوام کی یکجہتی کی خواہش بالآخر غالب آئے ۔

ہندوستھان سماچار

--------------

ہندوستان سماچار / محمد اصغر