حیدرآباد , 6 جنوری (ہ س)۔ ڈاکٹر بی آرامبیڈکرکونا سیما ضلع کے ملکلی پورم منڈل میں واقع موری۔5 آئل اینڈ گیس کنویں میں لگی آگ کی شدت میں منگل کی صبح معمولی کمی واقع ہوئی ہے۔ حکام کے مطابق پیرکے مقابلہ آگ کے شعلوں کی بلندی میں واضح طورپرکمی ہوئی ہے۔ او این جی سی حکام کا کہنا ہے کہ تیل اور گیس کے دباؤمیں بتدریج کمی آنے کی وجہ سے آگ کی شدت میں تقریباً 23 فیصد تک کمی آئی ہے تاہم دھماکوں کا سلسلہ مسلسل دوسرے دن بھی جاری رہا۔ یہ آگ گزشتہ 20 گھنٹوں سے مسلسل جاری ہے۔ ماہرین کی ایک ٹیم وہاں پہنچ چکی ہے جبکہ دہلی سے ایک خصوصی ٹیم بھی جلد پہنچنے والی ہے۔ آگ بجھانے کی کارروائیاں جاری ہیں جس کے تحت واٹرامبریلا تکنیک کا استعمال کرتے ہوئے چاروں اطراف سے پانی کی بوچھارکی جا رہی ہے۔ مزید پائپ لائنس نرساپورم سے منگوائی جا رہی ہیں تاکہ گیس کے اخراج کو قابوکرنے کی کوششوں کوتقویت مل سکے۔ اواین جی سی کے اعلیٰ حکام وہاں موجود رہ کرصورتحال کی نگرانی کررہے ہیں۔ احتیاطی تدابیر کے طور پراروسومانڈا گاؤں کے کئی خاندانوں کو وہاں سے نکال کرلکاورم گاؤں کے ایک کلیانہ منڈپم میں منتقل کردیاگیا ہے۔ ریونیو حکام کی جانب سے ان کے قیام اور کھانے پینے کے انتظامات کئے گئے ہیں۔ ضلع کلکٹرآرمہیش کماراورایس پی راہل مینا اپنی ٹیموں کے ساتھ امدادی کارروائیوں اور حفاظتی اقدامات کی براہِ راست نگرانی کر رہے ہیں۔ ہندوستھان سماچار

ہندوستان سماچار / محمدعبدالخالق