بائیو میڈیکل ویسٹ کا منصوبہ بند اور ضابطے کے مطابق بندوبست یقینی کریں: نائب وزیر اعلیٰ شکلا

نائب وزیر اعلیٰ راجندر شکلا نے محکمہ صحت عامہ اور طبی تعلیم کا جائزہ لیا۔

بھوپال، 06 جنوری (ہ س)۔

مدھیہ پردیش کے نائب وزیر اعلیٰ راجیندر شکلا نے دارالحکومت بھوپال واقع منترالیہ میں محکمہ صحت عامہ اور طبی تعلیم کے مختلف موضوعات کا تفصیلی جائزہ لیا۔ ریاست کی صحت خدمات کو مضبوط کرنے، طبی بنیادی ڈھانچے کی توسیع سے مربوط تجاویز پر تبادلہ خیال کر کے نائب وزیر اعلیٰ شکلا نے ضروری ہدایات دیں۔ انہوں نے ریوا، سنگرولی، گوالیار، ساگر اور بدھنی میڈیکل کالجوں کے تعمیراتی کاموں کی پیش رفت کا جائزہ لیا۔ انہوں نے تعمیراتی کاموں کو مقررہ وقت میں معیار کے ساتھ مکمل کرنے کی ہدایت دی۔ ساتھ ہی، ضروری آلات کی دستیابی، انسانی وسائل کی تقرری اور تعلیمی و طبی سرگرمیوں کے ہموار آپریشن کو یقینی بنانے پر زور دیا۔

نائب وزیر اعلیٰ شکلا نے بائیو میڈیکل ویسٹ کے سائنسی اور منصوبہ بند بندوبست کو یقینی بنانے کی ہدایت دی۔ انہوں نے کہا کہ سبھی صحت اداروں میں بائیو میڈیکل ویسٹ کے بندوبست کے اصولوں پر سختی سے عمل یقینی بنایا جائے، علیحدگی، کلیکشن، نقل و حمل اور ڈسپوزل کے انتظام کو موثر بنانے اور ماحولیاتی تحفظ کے معیاروں پر عمل کرنے کی ہدایت دی۔

میٹنگ میں پرائمری ہیلتھ سینٹر (پی ایچ سی)، کمیونٹی ہیلتھ سینٹر (سی ایچ سی) اور ضلع اسپتالوں کی اپ گریڈیشن سے متعلق تجاویز کا بھی جائزہ لیا گیا۔ نائب وزیر اعلیٰ شکلا نے کہا کہ دیہی اور شہری علاقوں میں صحت خدمات کی دستیابی اور معیار میں بہتری حکومت کی اولین ترجیحات میں شامل ہے۔ انہوں نے اپ گریڈیشن تجاویز کو عملی ضروریات کے مطابق تیار کرنے اور بروقت عملدرآمد کو یقینی بنانے کی ہدایت دی۔ نائب وزیر اعلیٰ شکلا نے ایسے سبھی موضوعات اور تجاویز، جن کے لیے مجاز کمیٹی یا کابینہ کی منظوری متوقع ہے، انہیں ترجیح کی بنیاد پر جلد آگے بڑھانے کی ہدایت دی، جس سے فیصلہ سازی کے عمل میں تاخیر نہ ہو اور منصوبوں کا فائدہ عام لوگوں تک وقت پر پہنچ سکے۔ پرنسپل سکریٹری صحت عامہ اور طبی تعلیم سندیپ یادو، کمشنر ترون راٹھی موجود تھے۔

ہندوستھان سماچار

ہندوستان سماچار / انظر حسن