حیدرآباد , 6 جنوری (ہ س)۔ تلنگانہ کے نائب وزیراعلیٰ اوروزیرتوانائی ملو بھٹی وکرامارکا نے قانون سازاسمبلی میں سنگارینی کالریزکمپنی لمیٹیڈ کے ملازمین اوران کے خاندانوں کی بہبود کے لئے کئی اہم فیصلوں کا اعلان کیا ہے۔ اسمبلی میں سنگارینی پرہونے والی بحث کا جواب دیتے ہوئے انہوں نے یقین دلایا کہ حکومت ورکرس کے مفادات کے تحفظ کے لئے ہر ممکن قدم اٹھائے گی۔ انہوں نے کہا کہ سنگارینی کے تحت چلنے والے علاقائی اسپتالوں میں ڈاکٹروں اورپیرامیڈیکل اسٹاف کی تمام خالی ملازمتوں کومارچ 2026 تک پرکردیاجائے گا۔ 32 ڈاکٹروں کے تقرر کا نوٹیفکیشن پہلے ہی جاری ہو چکا ہے جبکہ 176 پیرامیڈیکل اسٹاف کے تقررکاعمل جاری ہے۔راما گنڈم میں پی پی پی ماڈل کے تحت تعمیر ہونے والی کیتھ لیب کا کام مکمل ہو چکا ہے اورآئندہ 75 دنوں کے اندر اس کا افتتاح کردیا جائے گا جس سے گوداوری کھنی خطہ کے کارکنوں کو امراض قلب کے علاج کی جدید سہولیات میسر ہوں گی۔ریٹائرڈ ملازمین کوسی پی آرایم ایس اسکیم کے تحت 8 لاکھ روپے تک کی ادویات فراہم کی جا رہی ہیں۔ اس کے علاوہ خالی اراضیات پرریٹائرڈ ملازمین کوہاؤزنگ پلاٹ الاٹ کرنے کے بارے میں سنگارینی بورڈ جلد فیصلہ کرے گا۔سنگارینی ورکرس کوایک کروڑ روپے کا حادثاتی انشورنس کور فراہم کیا جا رہا ہے جس کا بوجھ نہ تو حکومت پرہے اورنہ ہی کمپنی پر۔نائب وزیراعلیٰ نے اعلان کیا کہ اس انشورنس اسکیم کا دائرہ کاراب محکمہ بجلی کی ڈسکام کے ملازمین تک بھی بڑھایا جائے گا۔بھٹی وکرامارکا نے مرکزی حکومت کی جانب سے کوئلہ کی کانوں کے ہراج کی پالیسی پرتشویش کا اظہارکرتے ہوئے کہا کہ اس سے سنگارینی کی مارکٹ متاثر ہو رہی ہے تاہم، کانگریس حکومت نے سنگارینی کوہراج میں حصہ لینے کی ترغیب دی جس کے نتیجہ میں کمپنی نے کچھ نئی کانیں حاصل کرنے میں کامیابی حاصل کی۔اسمبلی اجلاس کے خاتمہ کے 10 دنوں کے اندر ایک اہم اجلاس طلب کیا جائے گا جس میں وزراء، ارکان پارلیمنٹ، اور سنگارینی بیلٹ کے منتخب نمائندے شامل ہوں گے تاکہ کمپنی کے مستقبل اور کارکنوں کے مسائل پر تفصیلی تبادلہ خیال کیا جا سکے۔

ہندوستھان سماچار

ہندوستان سماچار / محمدعبدالخالق