مستحق غریبوں کے لیے مکانات کی فوری فراہمی کی خاطر آواز حیدرآباد ساؤتھ کمیٹی کا مطالبہ

حیدرآباد، 06 جنوری (ہ س)۔ آواز حیدرآباد ساؤتھ کمیٹی نے ضلع کلکٹر، حیدرآباد کوایک تحریری درخواست پیش کرتے ہوئے گذشتہ 40 برسوں سے کرایے کے مکانوں میں رہائش اختیار کرنے والے مستحق غریبوں کے لیے ڈبل بیڈروم مکان فراہم کرنے کی فوری اپیل کی ہے۔ کمیٹی کے ضلع صدر محمد محبوب علی، ضلع سکریٹری عبدالستار اور ضلع قائد غلام ناصرنے درخواست میں کہا ہے کہ حلقہ ملک پیٹ کے شنکرنگر اور دھوبی گلی کے رہائشی غریب لوگ اپنی معمولی آمدنی سے مکان کا کرایہ ادا کرنے اور تعلیم و طبی اخراجات برداشت کرنے سے قاصر ہیں۔

انہوں نے بتایا کہ متعدد بار حکام سے اپیلیں کی گئیں اورعنبرپیٹ ایم آراوسے بھی رجوع کیا گیا، لیکن نہ تو ایم آراو نے اور نہ ہی متعلقہ حکومت نے اس طرف توجہ دی۔ کمیٹی نے زور دیا کہ یومیہ اجرت پرکام کرنے والے یہ لوگ کسمپرسی کی زندگی گزارنے پرمجبورہیں اوران کی رہائش کے مسائل فوری حل کیے جائیں۔ آواز حیدرآباد ساؤتھ کمیٹی کی جانب سے کلکٹر سے درخواست کی گئی ہے کہ مستحق اور محتاج افراد کو ایک خالی ڈبل بیڈروم مکان فراہم کیا جائے تاکہ وہ انسانی وقار کے ساتھ زندگی گزار سکیں۔ کمیٹی نے اس اپیل کے اختتام پرامید ظاہرکی ہے کہ حکام عوامی مفاد میں فوری اور مؤثر کارروائی کریں گے۔

ہندوستھان سماچار

ہندوستان سماچار / محمدعبدالخالق