جموں, 04 جنوری (ہ س)۔

جموں کے ضلع ادھم پور سے ایک دلخراش واقعہ سامنے آیا ہے جہاں اپنے بیٹے کی موت کی خبر سن کر ماں صدمے کا شکار ہو کر جان بحق ہوگئی ۔متوفی نوجوان کی شناخت ارشد احمد کے طور پر ہوئی ہے جو ادھم پور ضلع کی رام نگر پنچایت کے گاؤں لرانہ کا رہائشی تھا۔ حکام کے مطابق ارشد احمد لکڑی لانے کے لیے قریبی جنگلاتی علاقے میں گیا تھا جہاں وہ حادثاتی طور پر ایک درخت سے گر گیا اور موقع پر ہی دم توڑ گیا۔

واقعے کے فوراً بعد ارشد احمد کی موت کی اطلاع اس کے اہل خانہ کو دی گئی۔ المناک خبر سنتے ہی اس کی والدہ زیتون بیگم شدید صدمے میں چلی گئیں اور گھر میں ہی بے ہوش ہو کر گر پڑیں، جس کے بعد انہیں فوری طور پر طبی امداد کے لیے اسپتال منتقل کیا گیا۔

تاہم، وہ اسپتال میں دم توڑ گئیں۔ اس افسوسناک واقعے سے پورے گاؤں میں غم کی فضا چھا گئی ہے، جہاں مقامی لوگوں نے ماں بیٹے کی یکے بعد دیگرے موت کو انتہائی دل دہلا دینے والا قرار دیا۔پولیس حکام کے مطابق دونوں اموات کے سلسلے میں ضروری قانونی کارروائی مکمل کر لی گئی ہے اور کسی بھی قسم کی بد نیتی یا سازش کے آثار نہیں پائے گئے ہیں۔ مقامی باشندوں نے واقعے پر گہرے رنج و غم کا اظہار کرتے ہوئے کہا کہ مختصر عرصے میں ماں اور بیٹے کی موت نے خاندان کو مکمل طور پر توڑ کر رکھ دیا ہے۔

ہندوستھان سماچار

---------------

ہندوستان سماچار / محمد اصغر