سرینگر، 4 جنوری( ہ س): ۔گزشتہ 24 گھنٹوں کے دوران وادی کشمیر کے مختلف علاقوں سے آگ لگنے کے 10 واقعات رپورٹ ہوئے ہیں، جن میں فائر اور ایمرجنسی سروسز کی ٹیموں نے آگ پر قابو پانے کے لیے تیزی سے قدم اٹھایا۔ فائر اینڈ ایمرجنسی سروسز ڈیپارٹمنٹ کی طرف سے شیئر کی گئی تفصیلات کے مطابق تمام واقعات پر بروقت قابو پالیا گیا، جس سے مزید نقصان کو روکا گیا۔ کسی جانی نقصان کی اطلاع نہیں ملی جبکہ آگ لگنے کی وجوہات کی تحقیقات کی جا رہی ہیں۔سری نگر میں، ابوبکر کالونی، حبک میں آگ لگنے سے ذخیرہ شدہ لکڑی اور پی وی سی پانی کے ٹینک کو نقصان پہنچا، جبکہ گنڈ چیک، بی کے پورہ میں دو گھاس کے ڈھیر جل گئے۔ حبہ کدل کے زیندر محلہ میں آگ لگنے سے کریانہ کی دکان جل گئی۔شمالی کشمیر میں کپواڑہ کے ملک محلہ میں ایک رہائشی مکان کو نقصان پہنچا جبکہ اسی ضلع کے اوورا کے درد محلہ میں ایک اور دو منزلہ مکان میں آگ لگ گئی۔ سوپور کے کنزر علاقے ملگام میں گھاس کے دو ڈھیروں کو نقصان پہنچا۔وہیں جنوبی کشمیر میں، اننت ناگ کے پیر پورہ، تلوانی میں ایک گھاس کے ڈھیر میں آگ لگنے کا واقعہ پیش آیا، جبکہ گجربستی، شیخ پورہ میں ایک گائے کے شیڈ کو نقصان پہنچا تھا۔ شوپیاں کے ہڈو اور کولگام کے احمد آباد، شیخ محلہ، ڈی ایچ پورہ میں دو دو منزلہ رہائشی مکانات آگ سے متاثر ہوئے۔ محکمہ نے کہا کہ فائر فائٹنگ ٹیموں کی بروقت مداخلت سے بڑے نقصانات کو ٹالنے میں مدد ملی۔ اے ڈی جی پی فائر اینڈ ایمرجنسی سروسز آلوک کمار نے لوگوں پر زور دیا کہ وہ آگ سے بچاؤ کے رہنما خطوط پر عمل کریں، محفوظ برقی تنصیبات کو یقینی بنائیں، اور اس طرح کے واقعات کے خطرے کو کم کرنے کے لیے آتش گیر مواد کے غلط ذخیرہ سے گریز کریں۔ہندوستھان سماچار

ہندوستان سماچار / Aftab Ahmad Mir