نئی دہلی، 9 نومبر (ہ س)۔ مرکزی زراعت اور کسانوں کی بہبود کے وزیر شیوراج سنگھ چوہان 10 نومبر کو اڈیشہ کے دورے پر ہوں گے۔ اس دوران وہ کسانوں کی آمدنی بڑھانے، غذائی تحفظ کو یقینی بنانے اور قدرتی کھیتی کو فروغ دینے سے متعلق پروگراموں میں حصہ لیں گے۔ زراعت اور کسانوں کی بہبود کی وزارت کے مطابق، وزیر زراعت صبح پٹنہ سے روانہ ہوں گے اور 11 بجے بھونیشور پہنچیں گے، جہاں وہ لوک سیوا بھون میں واقع کنونشن سینٹر میں منعقدہ 'مانڈیا دیوس (جوار کا دن)' پروگرام کے افتتاحی اجلاس میں بطور مہمان خصوصی شرکت کریں گے۔ اس موقع پر وہ اڈیشہ سمیت پورے ملک میں شری انا (موٹے اناج) کی پیداوار، پروسیسنگ اور استعمال کو فروغ دینے کے لیے مرکزی حکومت کے اقدامات کے بارے میں بات کریں گے۔

پروگرام کے بعد، مرکزی وزیر کٹک ضلع کے صدر علاقے کا سفر کریں گے، جہاں وہ کھیتوں کا معائنہ کریں گے اور کسانوں سے براہ راست بات چیت کریں گے۔ اس دوران وہ مرکزی حکومت کی مختلف زرعی اسکیموں کی زمینی صورتحال کا جائزہ لیں گے اور ان کے تجربات اور تجاویز جمع کریں گے۔

دوپہر میں، وہ کٹک کے بیدیادھر پور میں سنٹرل رائس ریسرچ انسٹی ٹیوٹ (سی آر آر آئی) میں ایک اسٹریٹجک میٹنگ کی صدارت کریں گے۔ میٹنگ میں پردھان منتری دھن دھنیا کرشی یوجنا، دالوں میں خود انحصاری کے مشن اور قدرتی کاشتکاری کے قومی مشن کے موثر نفاذ پر تفصیلی بات چیت ہوگی۔ اس میں وزارت زراعت کے سینئر افسران، آئی سی اے آر کے سائنسدان اور اڈیشہ حکومت کے نمائندے بھی شرکت کریں گے۔

اس دورے کے دوران، وہ مٹی کی صحت، فصلوں کے تنوع، پانی کی کارکردگی، اور پائیدار زرعی طریقوں سے متعلق علاقائی چیلنجوں کی بھی نشاندہی کریں گے۔

2023 کو جوار کا بین الاقوامی سال قرار دیئے جانے کے ساتھ، ریاست کے کوراپٹ، رائےگڑھا اور کندھمال اضلاع میں کمیونٹی پر مبنی اقدامات کے شاندار نتائج برآمد ہو رہے ہیں۔

شام کو تمام پروگراموں کے اختتام کے بعد، چوہان بھونیشور سے وجئے واڑہ کے لیے روانہ ہوں گے، جہاں وہ اگلے دن کئی پروگراموں میں حصہ لیں گے۔

---------------

ہندوستان سماچار / عبدالسلام صدیقی