نئی دہلی/ممبئی، 6 نومبر (ہ س)۔ پبلک سیکٹر کی انشورنس کمپنی لائف انشورنس کارپوریشن آف انڈیا (ایل آئی سی) نے رواں مالی سال 2025-26 کی جولائی-ستمبر سہ ماہی کے لیے اپنے نتائج کا اعلان کیا ہے۔ ایل آئی سی کا منافع 30 ستمبر کو ختم ہونے والی دوسری سہ ماہی میں 32فیصد بڑھ کر 10,053 کروڑ روپے ہو گیا۔ انشورنس کمپنی نے گزشتہ مالی سال 2024-25 کی جولائی-ستمبر سہ ماہی میں 7,621 کروڑ روپے کا خالص منافع کمایا تھا۔

ملک کی سب سے بڑی انشورنس کمپنی، ایل آئی سی نے جمعرات کو اسٹاک مارکیٹ کو مطلع کیا کہ مالی سال 2025-26 کی جولائی-ستمبر سہ ماہی میں اس کی کل آمدنی بڑھ کر 2,39,614 کروڑ روپے ہوگئی، جو گزشتہ مالی سال 2024-25 کی اسی سہ ماہی میں 2,29,620 کروڑ روپے تھی۔ اس کے ساتھ دوسری سہ ماہی میں کمپنی کی خالص پریمیم آمدنی بڑھ کر 1,26,479 کروڑ روپے ہوگئی، جو پچھلے مالی سال کی اسی سہ ماہی میں 1,19,901 کروڑ روپے تھی۔

ایل آئی سی کے مطابق، مالی سال 2025-26 کی جولائی-ستمبر سہ ماہی کے دوران کمپنی کے کل اخراجات بڑھ کر 230,160 کروڑ ہو گئے، جو پچھلے مالی سال کی اسی سہ ماہی میں 222,366 کروڑ تھے۔ دریں اثنا، دوسری سہ ماہی میں کمپنی کی خالص پریمیم آمدنی سال بہ سال 5.5 فیصد بڑھ کر 1.26 لاکھ کروڑ ہوگئی۔ مزید برآں، ایل آئی سی کا اے یو ایم 3.31 فیصد بڑھ کر 57.23 لاکھ کروڑ ہو گیا۔

بیمہ کمپنی کے سی ای او اور ایم ڈی آر ڈوریسوامی نے ایک بیان میں کہا، ہم ایل آئی سی میں حکومت ہند کی طرف سے بیمہ صنعت کے لیے ستمبر 2025 کے دوران اعلان کردہ جی ایس ٹی تبدیلیوں کے مثبت اثرات کے بارے میں بہت پر امید ہیں۔ ڈوریسوامی نے کہا، ہم پختہ یقین رکھتے ہیں کہ یہ تبدیلیاں صارفین کے بہترین مفاد میں ہیں اور ہندوستان میں لائف انشورنس انڈسٹری کی ترقی کو مزید تیز کریں گی۔ ایل آئی سی کے طور پر، ہم نے اس بات کو یقینی بنایا ہے کہ جی ایس ٹی کی تبدیلیوں کے تمام فوائد ہمارے صارفین تک پہنچیں۔

---------------

ہندوستان سماچار / عبدالسلام صدیقی