شمالی 24 پرگنہ، 5 نومبر (ہ س)۔

ایس آئی آر (اسپیشل انٹینسیو ریویژن) کے عمل کو لے کر مغربی بنگال میں سیاسی گرما گرمی بڑھنے کے ساتھ ہی، شمالی 24 پرگنہ ضلع کے گھولا علاقے میں ایک واقعہ پیش آیا ہے۔ سی پی آئی (ایم) کے مقامی پارٹی دفتر کو رات گئے بلڈوزر کے ذریعے منہدم کر دیا گیا۔

سی پی آئی (ایم) نے واقعہ کے پیچھے ترنمول کانگریس کے حمایت یافتہ شرپسندوں کا ہاتھ ہونے کا الزام لگایا ہے۔ ترنمول کانگریس نے ان الزامات کو یکسر مسترد کرتے ہوئے کہا ہے کہ عمارت پہلے ہی خستہ حال تھی اور کافی عرصے سے بند تھی۔

سی پی آئی (ایم) کا وہاں پرانا دفتر تھا، جو کئی سالوں سے بند تھا۔

اطلاعات کے مطابق عمارت کی چھت کافی عرصے سے خستہ حالت میں تھی۔ بدھ کی صبح جب مقامی لوگ پہنچے تو انہوں نے دیکھا کہ بلڈوزر کے ذریعے پوری عمارت کو گرا دیا گیا ہے۔

جیسے ہی اس واقعہ کی خبر پھیلی، مقامی سی پی آئی (ایم) کارکنان اور حامی جائے وقوعہ پر پہنچ گئے اور زبردست احتجاج شروع کردیا۔ تھانہگھولا کی پولیس بھی پہنچی اور حالات پر قابو پانے کی کوشش کی۔ سی پی آئی (ایم) قائدین نے کہا کہ انہوں نے پولیس اسٹیشن میں تحریری شکایت درج کرائی ہے۔

دوسری طرف، مقامی ترنمول قیادت نے سی پی آئی (ایم) کے الزامات کو بے بنیاد قرار دیا ہے۔ ان کا کہنا ہے کہ سی پی آئی (ایم) کا دفتر گزشتہ دس سالوں سے بند پڑا تھا اور عمارت کی خستہ حالی کی وجہ سے یہ عمارت خود ہی گر گئی ہوگی۔ ترنمول کانگریس کا اس واقعہ سے کوئی لینا دینا نہیں ہے۔ اپوزیشن صرف اور صرف سیاسی فائدے کے لیے جھوٹے الزامات لگا رہی ہے۔

پولیس نے پورے واقعہ کی تحقیقات شروع کر دی ہے۔ واقعے کے بعد سے علاقے میں کشیدگی کا ماحول ہے اور انتظامیہ صورتحال پر گہری نظر رکھے ہوئے ہے۔

ہندوستھان سماچار

ہندوستان سماچار / عطاءاللہ