جموں, 22 نومبر (ہ س)۔

جموں و کشمیر بی جے پی کے سنئیر لیڈر و قائد حزب اختلاف سنیل شرما نے ہفتہ کو نیشنل کانفرنس پر سخت تنقید کرتے ہوئے الزام عائد کیا کہ پارٹی نے انتخابات سے قبل مفت بجلی کا وعدہ کر کے انتخابی دھوکہ دیا، جب کہ اب حکومت عوام پر 20 فیصد ٹیرف اضافہ مسلط کرنے کی تیاری کر رہی ہے۔

سنیل شرما نے کہا کہ این سی کا 2024 کا انتخابی منشور اپنے ہی جھوٹ اور بے بنیاد دعوؤں کے بوجھ تلے دھڑام سے گر گیا ہے۔عمر عبداللہ نے جموں و کشمیر کے ہر گھر کو 200 یونٹ مفت بجلی دینے کا وعدہ کیا تھا۔ آج، ایک سال سے زائد عرصہ گزر جانے کے باوجود اس وعدے پر عمل کرنے کے بجائے ان کی حکومت عوام کو لوٹنے کے لیے پیک آور ٹیرف میں 20 فیصد اضافہ لانے جا رہی ہے۔

وزیر اعلیٰ کو براہِ راست چیلنج کرتے ہوئے شرما نے کہا کہ اگر عمر عبداللہ میں ذرا سا بھی اخلاقی حوصلہ ہے تو وہ بتائیں کہ کتنے گھروں کو دراصل یہ 200 یونٹ مفت بجلی فراہم کی گئی۔عوام کو یہ جاننے کا پورا حق ہے کہ انہیں کس قدر گمراہ کیا گیا ہے۔شرما نے واضح کیا کہ بی جے پی کسی ایسے قدم کی سخت مزاحمت کرے گی جو عام شہریوں پر مالی بوجھ بڑھائے۔ انہوں نے کہا کہ مجوزہ ٹیرف اضافہ مختلف سیاسی جماعتوں، تاجروں اور عام صارفین میں شدید ناراضی پیدا کر چکا ہے، جو اسے ناجائز، استحصالی اور عوام دشمن فیصلہ قرار دے رہے ہیں۔

انہوں نے مطالبہ کیا کہ این سی حکومت اس مجوزہ اضافہ کو فوراً واپس لے اور وہ وعدے پورے کرے جو اس نے انتخابات کے دوران عوام سے کیے تھے، نہ کہ انہی لوگوں کو سزا دے جنہیں سہارا دینے کا دعویٰ کیا گیا تھا۔

ہندوستھان سماچار

---------------

ہندوستان سماچار / محمد اصغر