حیدرآباد ، 22 نومبر (ہ س)۔راجندرنگر سرکل کے تحت پلر نمبر 294 کے قریب آرم گھر کراس روڈ پرآج بلدی حکام کی جانب سے بڑے پیمانے پر ناجائز قبضہ جات ہٹانے کی کارروائی کی گئی۔راجندرنگر ڈپٹی کمشنر سریندر ریڈی کی ہدایت پر یہ خصوصی مہم ٹاؤن پلاننگ اے سی پی سری دھر کی نگرانی میں انجام دی گئی۔ کارروائی کے دوران پولیس کی بھاری نفری تعینات رہی تاکہ کسی قسم کی رکاوٹ یاہنگامی صورتحال سے نمٹا جا سکے۔بلدی عملہ نے فُٹ پاتھ اور سڑک کنارے قائم غیر مجاز ڈھانچوں، ٹھیلوں اورکاروباری قبضوں کو ہٹاتے ہوئے عوامی راستوں کو خالی کرایا۔ کارروائی کے دوران چند فٹ پاتھ فروشوں نے مزاحمت کی کوشش کی، تاہم پولیس نے فوری مداخلت کرتے ہوئے انہیں وہاں سے ہٹا دیااور ماحول کو قابو میں رکھا۔حکام کے مطابق علاقے میں ٹریفک روانی اور راہگیروں کی سہولت کو یقینی بنانے کے لیے مستقبل میں بھی ایسی مہمات جاری رہیں گی۔
ہندوستھان سماچار
ہندوستان سماچار / محمدعبدالخالق
22 Nov 2025
