نئی دہلی، 17 نومبر (ہ س) ۔شمال مغربی ضلع کے مہیندر پارک پولیس اسٹیشن کی پولیس نے اپنی بیوی کے قتل کے الزام میں ایک شوہر کو گرفتار کیا ہے۔ گرفتار ملزم کی شناخت جہانگیر پوری کے رہنے والے وشنو شرما (31) کے طور پر کی گئی ہے۔ ملزم اس سے قبل ایکسائز ایکٹ اور چوری کی تین وارداتوں میں ملوث ہے۔ پولیس کے مطابق ملزم وشنو شرما کو شک تھا کہ اس کی بیوی شویتا شرما کے کسی سے ناجائز تعلقات ہیں۔ اس بات پر ان کا اکثر جھگڑا رہتا تھا۔ 13 نومبر کو، رات 9 بجے کے قریب، ان کے درمیان ایک اور بحث چھڑ گئی۔ ملزم نے طیش میں آکر بیوی کو قتل کردیا۔ اس کے بعد اس نے لاش کو ٹھکانے لگایا اور کسی بھی ثبوت کو مٹانے کے لیے اسے قریبی نالے میں پھینک دیا۔

شمال مغربی ضلع کے ڈپٹی کمشنر آف پولیس بھیشم سنگھ نے پیر کو بتایا کہ 14 نومبر کو شام 4:30 بجے، پولیس کو ایک پی سی آر کال موصول ہوئی جس میں جہانگیر پوری کے صنعتی علاقے میں ایک نالے کے قریب ایک خاتون کی لاش کی دریافت کی اطلاع ملی۔ پولیس کی ٹیم نے جائے وقوعہ پر پہنچ کر لاش کو قبضے میں لے لیا۔ اسی دوران ملزم وشنو جائے وقوعہ پر پہنچا اور واقعہ کا اعتراف کرتے ہوئے دعویٰ کیا کہ متوفی اس کی بیوی تھی۔ پولیس نے قریبی سی سی ٹی وی کیمروں کی فوٹیج کا بھی جائزہ لیا، جس میں واضح طور پر ملزم کو اپنی بیوی کی لاش کو کندھے پر اٹھائے نالے کی طرف جاتے ہوئے دکھایا گیا۔

ہندوستھان سماچار

ہندوستان سماچار / Mohammad Khan