حیدرآباد، 17 نومبر (ہ س)۔
ون گروپ ایشیا کے چیف ایگزیکٹیو آفیسر پھام سنت چاؤ نے وزیراعلی ریونت ریڈی سے ملاقات کی اور تلنگانہ میں پروجیکٹ کے قیام اور سرمایہ کاری میں دلچسپی کا اظہار کیا۔ چیف ایگزیکٹیو آفیسر نے ریونت ریڈی کو ون گروپ کی کارکردگی اور توسیعی منصوبہ سے واقف کرایا اور کہا کہ وہ تلنگانہ میں الیکٹریک وہیکل مینوفیکچرنگ یونٹ اور بیٹری اسٹوریج سہولت کے آغازمیں دلچسپی رکھتے ہیں۔ انہوں نے سولار اورونڈ انرجی پروجیکٹس میں بھی تلنگانہ حکومت کے ساتھ اشتراک کی پیشکش کی تاکہ کلین انرجی کے توسیعی منصوبہ کو کامیاب کیا جاسکے۔ ون گروپ ایشیا کے چیف ایگزیکٹیو آفیسر نے بھارت فیوچر سٹی میں اپنی دلچسپی ظاہر کی اور ریاست کی ترقی سے متعلق وزیراعلی ریونت ریڈی کے ویژن کی ستائش کی۔ انہوں نے کہا کہ ون گروپ حکومت کے ترقیاتی منصوبہ میں تعاون کیلئے تیار ہے۔وزیراعلی نے پھام سنت چاؤ اور ون گروپ کے چیرمین پھام ناتھ ووگ کو تلنگانہ رائزنگ گلوبل سمٹ 2025 میں شرکت کی دعوت دی جو 8 اور 9 ڈسمبر کو حیدرآباد میں منعقد ہوگا۔ ملاقات کے موقع پرسکریٹری انڈسٹریز بی اجیت ریڈی، اسپیشل چیف سکریٹری برائے وزیراعلی سنجے کمار، سکریٹری پروجیکٹس ڈاکٹر گورو اپل اوردیگر موجود تھے۔۔ہندوستھان سماچار
ہندوستان سماچار / محمدعبدالخالق
17 Nov 2025