علی پور دوار، 11 اکتوبر (ہ س)۔ علی پور دوار ضلع کے ضلع کونسل کے دفتر میں جمعہ کی شام اس وقت سنسنی پھیل گئی جب کونسل کی سرکاری ویب سائٹ پر ہیکنگ کا الرٹ نمودار ہوا۔ ویب سائٹ کھولنے پر اسکرین پر پاکستانی جھنڈا اور غلط املا میں دھمکی آمیز پیغام نظر آیا۔ اس پیغام میں ہندوستان کی ”ڈیجیٹل انڈیا“ اسکیم کو دھمکی دی گئی تھی۔

ذرائع کے مطابق یہ پیغام جمعہ کی شام اس وقت سامنے آیا جب ضلع کونسل کی ویب سائٹ کا ٹینڈر سیکشن کھولا گیا۔ اس میں لکھا گیا کہ ”ڈیجیٹل انڈیا کا خواب کبھی پورا نہیں ہو گا کیونکہ پاکستان بار بار ہیکنگ کے ذریعہ اس خواب کی راہ میں رکاوٹ بنے گا، ڈر پھیلائے گا اور ڈیٹا چوری کرے گا۔“

اس واقعہ سے دفتر میں افراتفری مچ گئی۔ ضلع کونسل کی چیئرپرسن اسنیگدھا شیو کو فوری طور پر اطلاع دی گئی۔ وہ جائے وقوعہ پر پہنچیں اور پورے معاملے کی چھان بین کی۔ ویب سائٹ کی دیکھ بھال کرنے والی کمپنی کو بھی فوری طور پر مطلع کر دیا گیا۔

کمپنی نے ضلع کونسل کو یقین دہانی کرائی ہے کہ ہفتہ تک ویب سائٹ کو ٹھیک کر دیا جائے گا۔ اسنیگدھا شیو نے کہا، ”پاکستانی پرچم اور پیغام ویب سائٹ پر ظاہر ہوا، لیکن ابھی تک کسی مجرمانہ سرگرمی یا ڈیٹا کی چوری کی نشاندہی کرنے کا کوئی ثبوت نہیں ہے۔ اس لیے ابھی تک پولیس میں شکایت درج نہیں کی گئی۔

اس واقعے کے بعد مقامی طور پر یہ افواہیں پھیل گئیں کہ ویب سائٹ پاکستان سے ہیک کر لی گئی ہے۔ تاہم حکام کا کہنا ہے کہ اس کی تصدیق تحقیقات کے بعد ہی ہو سکتی ہے۔ انتظامیہ نے معاملے کو سنجیدگی سے لیا ہے اور سائبر سیکورٹی ایجنسیوں سے رابطہ کیا ہے۔

ہندوستھان سماچار

ہندوستان سماچار / محمد شہزاد