ممبئی ، 5 ستمبر (ہ س) مہاراشٹر حکومت نے ریاست کی تمام میونسپل کارپوریشنوں میں خواجہ سرا افراد کے لیے الگ بیت الخلا کی سہولت فراہم کرنے کا اہم فیصلہ کیا ہے۔ اس منصوبے کے لیے حکومت نے 10 کروڑ روپے کی رقم مختص کی ہے اور تمام میونسپل کارپوریشنوں سے بیت الخلا کی تعمیر کے لیے تجاویز طلب کی گئی ہیں۔

ریاستی شہری ترقی کی وزیر مملکت مادھوری میسال نے بتایا کہ اس منصوبے پر جلد ہی کام شروع کیا جائے گا۔ انہوں نے کہا کہ موجودہ عوامی بیت الخلا استعمال کرتے وقت خواجہ سرا افراد کو کئی طرح کی مشکلات کا سامنا کرنا پڑتا ہے۔ اسی صورتحال کو مدنظر رکھتے ہوئے حکومت نے یہ فیصلہ کیا ہے تاکہ انہیں عوامی مقامات پر محفوظ، آسان اور باعزت طریقے سے بیت الخلا کی سہولت دستیاب ہو سکے۔

حکومت کا منصوبہ نئے بیت الخلا کے لیے الگ سے جگہ تلاش کرنے کے بجائے پہلے سے موجود عوامی بیت الخلا کے بغل میں یا اس کے آس پاس خواجہ سرا افراد کے لیے الگ سہولت تعمیر کرنے کا ہے۔ اس طریقے سے موجودہ بنیادی ڈھانچے کا استعمال کرتے ہوئے تعمیراتی کام کو تیزی سے مکمل کرنے کی کوشش کی جائے گی۔ اس سلسلے میں ریاست کی تمام میونسپل کارپوریشنوں کو ہدایت دی گئی ہے کہ وہ اپنے علاقوں میں مطلوبہ بیت الخلا کی تعداد، دستیاب جگہ اور مجوزہ مقامات سے متعلق مکمل معلومات جمع کرکے حکومت کو پیش کریں۔

میونسپل کارپوریشنوں سے موصول ہونے والی تجاویز کی بنیاد پر فنڈز کی منصوبہ بندی کی جائے گی۔ اس کے بعد ضرورت اور دستیاب جگہ کے مطابق مختلف مراحل میں خواجہ سرا افراد کے لیے الگ بیت الخلا تعمیر کیے جائیں گے۔ حکومت کا کہنا ہے کہ اس اقدام کا بنیادی مقصد خواجہ سرا افراد کو عوامی مقامات پر بیت الخلا استعمال کرنے کے دوران پیش آنے والی مشکلات کو کم کرنا اور انہیں محفوظ، آسان اور باوقار سہولت فراہم کرنا ہے۔

ہندوستھان سماچار

--------------------

ہندوستان سماچار / جاوید این اے