لکھنؤ، 29 ستمبر (ہ س)۔ اتر پردیش کے دارالحکومت لکھنؤ کے کرشنا نگر تھانہ علاقے میں سرویلانس ٹیم اور مقامی پولیس نے خاتون کے قتل کے معاملے میں مطلوب 25 ہزار روپے کے انعامی ملزم کو پولیس انکاونٹر کے بعد گرفتار کر لیا۔ ملزم کی ٹانگ میں گولی لگی ہے۔ اس کے قبضے سے دیسی ساختہ پستول، کارتوس اور دیگر اشیا برآمد کی گئی ہیں۔

پولیس کے مطابق، جنوبی زون کی ڈپٹی کمشنر پولیس محمد مشتاق نے بتایا کہ نارائن پوری کی رہائشی ریکھا سنگھ نے 15 ستمبر کو تھانے میں شکایت درج کرائی تھی کہ ان کی بیٹی رادھا کو اینٹ سے حملہ کرکے قتل کر دیا گیا ہے۔ واقعے کا سراغ لگانے کے لیے تین ٹیمیں تشکیل دی گئی تھیں۔ جائے وقوعہ اور آس پاس کے علاقوں کے تقریباً 150 سے 170 سی سی ٹی وی کیمروں کی فوٹیج اور الیکٹرانک شواہد کی باریک بینی سے جانچ کے بعد ملزم کی تلاش کی جا رہی تھی۔

پیر کی رات چیکنگ کے دوران، پولیس ٹیم نے اسکوٹی سوار ایک شخص کو روکنے کی کوشش کی، لیکن وہ رکنے کے بجائے فرار ہونے لگا۔ ڈوڈا کالونی، آشرام باپو مارگ، وجے نگر کے قریب پہنچنے پر وہ بے قابو ہو کر گر گیا۔

پولیس کے مطابق خود کو گھرا ہوا دیکھ کر ملزم نے فائرنگ شروع کر دی۔ جوابی کارروائی میں اس کے دائیں پیر میں گولی لگی، جس کے بعد اسے گرفتار کر لیا گیا۔ ملزم کی شناخت اتر پردیش کے اناو ضلع کے ندوہا گاؤں کے رہائشی بھولا راجپوت کے طور پر ہوئی ہے۔

گرفتار ملزم قتل کے مقدمے میں مطلوب تھا اور اس کی گرفتاری پر 25 ہزار روپے کا انعام مقرر کیا گیا تھا۔ اسے علاج کے لیے لوک بندھو اسپتال میں داخل کرایا گیا ہے۔ پولیس نے فارنسک ٹیم کے ساتھ جائے وقوعہ سے شواہد بھی اکٹھے کیے۔

ہندوستھان سماچار

ہندوستان سماچار / محمد شہزاد