آئیچی-ناگویا، 27 ستمبر (ہ س)۔

جاپان کے آئیچی-ناگویا میں جاری ایشیائی کھیلوں میں بھارت کی ایتھلیٹ اینسی سوجن نے خواتین کی لمبی چھلانگ کے مقابلے میں چاندی کا تمغہ جیت لیا۔ فائنل میں ابتدائی طور پر سرفہرست رہنے کے باوجود آخری لمحات میں ہونے والی تبدیلی کے باعث اینسی سوجن سونے کا تمغہ حاصل کرنے سے محروم رہ گئیں۔

مقابلے کے دوران اینسی سوجن نے اپنی پہلی ہی کوشش میں 6.49 میٹر کی چھلانگ لگائی۔ اس کے بعد پانچویں کوشش میں انہوں نے 6.53 میٹر کی شاندار چھلانگ لگا کر سونے کے تمغے کے لیے اپنی پوزیشن مضبوط کر لی۔ اس دوران ابتدا میں پیچھے چل رہی چین کی ہوانگ ینگ ینگ نے اپنی پانچویں کوشش میں 6.49 میٹر کی چھلانگ لگائی۔

تاہم سرفہرست چل رہی اینسی سوجن کو اس وقت بڑا دھچکا لگا جب چینی ایتھلیٹ نے اپنی آخری کوشش میں 6.55 میٹر کی چھلانگ لگا کر مقابلے کا رخ بدل دیا۔ چینی کھلاڑی کی اس شاندار واپسی کے بعد اینسی سوجن نے بھی اپنی آخری کوشش میں دوبارہ سرفہرست مقام حاصل کرنے کی کوشش کی، لیکن وہ 6.49 میٹر ہی کی چھلانگ لگا سکیں۔ اس کے نتیجے میں انہیں چاندی کے تمغے پر اکتفا کرنا پڑا۔

اس مقابلے کا کانسی کا تمغہ بھی چین کی منگائی تان نے حاصل کیا۔ منگائی نے فائنل میں 6.46 میٹر کی چھلانگ لگا کر تیسری پوزیشن حاصل کی اور بھارت کی شائلی سنگھ کو پیچھے چھوڑ دیا، جنہوں نے 6.42 میٹر کی چھلانگ لگائی۔ شائلی سنگھ مقابلے کے آخری لمحات میں تیسری پوزیشن حاصل کرنے سے محروم رہ گئیں۔

ہندوستھان سماچار

ہندوستان سماچار / عطاءاللہ