آئیچی-ناگویا، 24 ستمبر (ہ س)۔ ہندوستانی اسکواش کھلاڑی اناہت سنگھ اور تنوی کھنہ نے شاندار کارکردگی کا مظاہرہ کرتے ہوئے ایشیائی کھیل 2026 کے خواتین کے سنگلز مقابلے کے کوارٹر فائنل میں جگہ بنا لی ہے۔ دونوں ہندوستانی کھلاڑیوں کی کامیابی کے بعد اب کوارٹر فائنل میں ان کا آپس میں مقابلہ ہوگا۔

تیسری سیڈڈ اناہت سنگھ نے سنگاپور کی او یانگ وائی لن کو مسلسل تین گیمز میں 4-11، 5-11، 7-11 سے شکست دی۔ ورلڈ کپ فاتح اناہت نے مقابلے کے آغاز ہی سے اپنا دباو برقرار رکھا اور آسانی سے کوارٹر فائنل میں جگہ بنائی۔

وہیں تنوی کھنہ نے سنگاپور کی او یانگ وائی یان کو 11-5، 4-11، 5-11، 11-13 سے شکست دے کر آخری آٹھ میں جگہ بنائی۔ تنوی کو پہلے گیم میں شکست کا سامنا کرنا پڑا، لیکن اس کے بعد انہوں نے مسلسل تین گیمز جیت کر مقابلہ اپنے نام کر لیا۔

اس کامیابی کے ساتھ خواتین کے سنگلز اسکواش میں آل انڈیا کوارٹر فائنل طے ہو گیا ہے۔ اب اناہت اور تنوی میں سے ایک کھلاڑی سیمی فائنل میں پہنچے گی۔ ایشیائی کھیلوں کے اسکواش مقابلے کا فاتح 2028 لاس اینجلس اولمپکس کے لیے براہ راست کوالیفائی کرے گا۔ اسکواش 2028 اولمپکس میں پہلی بار شامل ہوگا۔

اس سے قبل ہندوستانی جوڑی جوشنا چنپا اور ویلاون سینتھل کمار نے مکسڈ ڈبلز کے کوارٹر فائنل میں جگہ بنائی۔ ہندوستانی جوڑی نے ہم وطن سورج چند اور شمینہ ریاض کو 7-11، 10-11 سے 0-2 سے شکست دی۔

ہندوستھان سماچار

ہندوستان سماچار / محمد شہزاد