نئی دہلی، 23 ستمبر (ہ س):۔

سرکاری شعبے کے بینکوں کی 28 سے 30 ستمبر تک مجوزہ ملک گیر ہڑتال کے پیش نظر ریزرو بینک آف انڈیا (آر بی آئی) نے بڑا فیصلہ کیا ہے۔ ریزرو بینک نے کہا ہے کہ اتوار، 27 ستمبر 2026 کو بینک کھلے رہیں گے، تاکہ صارفین کو کسی پریشانی کا سامنا نہ کرنا پڑے۔

وزارت خزانہ نے بدھ کو جاری ایک بیان میں کہا کہ یونائیٹڈ فورم آف بینک یونینز (یو ایف بی یو) نے 28 سے 30 ستمبر 2026 تک تین روزہ ملک گیر بینک ہڑتال کی اپیل کی ہے۔ یہ ہڑتال 26 اور 27 ستمبر کی ہفتہ وار تعطیلات کے فوراً بعد ہونے جا رہی ہے۔ اسی لیے حکومت نے شہریوں کی بینکنگ ضروریات کو مدنظر رکھتے ہوئے پہلے ہی ضروری اقدامات کیے ہیں۔

وزارت نے کہا کہ عام لوگوں کی ضروری بینکنگ خدمات طویل عرصے تک متاثر نہ ہوں، اس بات کو یقینی بنانے کے لیے تمام سرکاری شعبے کے بینک اور علاقائی دیہی بینک اتوار، 27 ستمبر 2026 کو معمول کے مطابق کام کریں گے۔

وزارت خزانہ نے بتایا کہ ریزرو بینک نے تمام بینک شاخوں، دفاتر، اے ٹی ایم سے منسلک شاخوں اور کرنسی چیسٹ کو 27 ستمبر 2026 کو مکمل طور پر فعال رکھنے کی منظوری دے دی ہے۔

وزارت خزانہ نے کہا کہ بینک صارفین کی فلاح و سہولت حکومت کی اولین ترجیح ہے۔ حکومت اور بینک انتظامیہ نے یونینوں سے مجوزہ ہڑتال واپس لینے کی اپیل کی ہے اور یہ یقینی بنانے کے لیے بھی اقدامات کیے ہیں کہ ضروری بینکنگ خدمات بلا رکاوٹ جاری رہیں۔

ہندوستھان سماچار

ہندوستان سماچار / عطاءاللہ