علی گڑھ, 23 ستمبر (ہ س)۔

اے ایم یو اے بی کے ہائی اسکول گرلز نے بچوں کے لیے نظم خوانی مقابلے کا انعقاد کیا، جس میں علی گڑھ مسلم یونیورسٹی کے مختلف اسکولوں کے پرائمری سیکشن کے بچوں نے شرکت کی۔

پروگرام کا آغاز اے ایم یو اے بی کے ہائی اسکول گرلز کی نائب پرنسپل ڈاکٹر صبا حسن کے استقبالیہ خطاب سے ہوا۔ انہوں نے طلبہ کی پُرجوش شرکت کو سراہا اور اساتذہ اور شریک اسکولوں کی مخلصانہ کوششوں کو بھی تسلیم کیا۔

ویمنس کالج، علی گڑھ مسلم یونیورسٹی کے شعبہ تعلیم کی پروفیسر نکہت یاسمین شفیق نے بحیثیت مہمانِ خصوصی شرکت کی۔ انہوں نے بچوں کو ہمہ جہت شخصیت سازی پر توجہ مرکوز کرنے کی ترغیب دی اور ان کی پیشکش کو سراہا۔

پروگرام کی کوآرڈینیٹر ڈاکٹر فرحت پروین نے نظامت کے فرائض انجام دیے۔ بچوں نے اسٹیج پر اعتماد کے ساتھ نظمیں پیش کیں، جنہیں حاضرین نے خوب سراہا۔

مقابلے کے جج کے فرائض ویمنس کالج کی اسسٹنٹ پروفیسر ڈاکٹر شگفتہ انجم نے انجام دیے۔ بچوں سے خطاب کرتے ہوئے انہوں نے باقاعدگی سے مطالعہ کرنے کی عادت پیدا کرنے کی اہمیت پر زور دیا اور انہیں کتابیں پڑھنے کی ترغیب دی۔

اے بی کے گرلز کی طالبہ علیمہ شیروانی نے پہلا مقام، اے بی کے گرلز کی رحمہ مسعود انصاری نے دوسرا مقام اور اے ایم یو گرلز کی مرحہ خان نے تیسرا مقام حاصل کیا۔ اے بی کے بوائز کے محمد ایان اور احمدی اسکول کی طالبات حفصہ اور ادیبہ کو حوصلہ افزائی انعامات دئے گئے۔

---------------

ہندوستان سماچار / سید کامران علی گڑھ